ارضوا بحياتكم الزوجية يا شباب، مفيش حد كامل

ارضوا بحياتكم الزوجية يا شباب، مفيش حد كامل، النقص والتقصير من طبائع البشر أصلا.. ؟

الزوجة الطيبة ممكن متكونش بتعرف تتكلم كويس ومدب ، وكلامها يعمل مشاكل..

واللي بتعرف تتكلم، ممكن متكونش على قدر من الجمال، وكل شوية الشيطان يقولك مش كنت اتجوزت بنت خالك وهدان ؟

واللي على قدر من الجمال مش عارفة تعمل دايت، ووزنها في زيادة مستمرة..

واللي عاملة دايت وعايشة حياة هيلثي وبتفطر ٣ ثمرات فراولة + ٤ حبات من بذور الشيا مزعجة وصوتها عالي، والجيران بيسمعوها ليل نهار وبيخوفوا بيها الأطفال الصغيرة..

واللي صوتها هادي ورقيقة عاملة مشاكل مع أمك وأختك ونساء كوكب بلوتو اللي في العيلة عندك..

واللي علاقتها حلوة بأهلك كسولة ومش بتنضف البيت وبتصحى العصر ومش بتعمل أكل وعاوزة دايما أكل جاهز..

وست البيت الشاطرة مش بتشاركك اهتماماتك ولا مثقفة زيك وطول النهار قدام قنوات المطبخ..

والمثقفة القارئة اللي بتشاركك اهتماماتك عاوزة تستقل بنفسها وتسيب الأطفال الرضع عند والدتها، ويبقى ليها مصدر دخل زيك، وعاوزة تشتغل رغم إنكم مش في حاجة للفلوس أو الشغل وربنا كارمك من وسع..

واللي شايفة الست مكانها البيت فمش عاوزة تعمل أي شيء في البيت وعاوزة تروح لوالدتها ٣ مرات كل ١٣ ساعة، تقريبا  مفكرة إن البنت مكانها البيت يعني بيت والدتها..

المهم إن الكمال ده شيء عزيز ونادر جدا، ولو الحياة وقفت على كل مشكلة فمش هنخلص، كل الناس فيهم عيوب وأخطاء، ودورونا إننا نتفهم أخطاء بعض ونحاول نصلح من أخطائنا وننصح بعض ونلتمس لبعض أعذار..

النبي -صلى الله عليه وسلم- هو اللي علمنا الأمر ده لما قال: "لا يفرك ( لا يبغض ) مؤمن مؤمنة، إن كره منها خُلُقًا، رضي منها آخر"..

لو كرهت من زوجتك صفة أو طبع معين، فقدامك طباع كثيرة تحبها وترضى بيها وتخليك تكمل وتوائم أمورك عن قناعة وحب تام ، وخليك فاكر إن مفيش مؤمن يكره مؤمنة، ممكن نختلف نعم ونحل خلافاتنا، لكن نكره بعض لأ..

هي دي طبيعة الحياة، لازم نتقبلها كده، والمقارنات عمرها ما جابت نتيجة، لإن كل صورة انت شايفها خلفها جزء في الظَّهر -بنفس حجم الصورة- انت مش شايفة..

لو الشيطان جالك وحاول يدخلك من المدخل ده عشان يكرهك في زوجتك عشان صفة ولا اتنين مش عاجبينك، هات ورقة وقلم واكتب صفاتها الكويسة هتلاقيهم أكتر بكتير جدا من العيوب، بل أكتر مما تتخيل..

احنا نفسنا كرجال مليانين عيوب وأخطاء، مفيش فينا ملائكة، وممكن أعملك بوست على صفات الرجال قد ده ٣ مرات، عشان كده بنقول لازم نفوِّت لبعض، ونتجاوز ونلتمس أعذار ونسامح عشان الحياة تمشي..

العلاقة لازم تكون علاقة تكامل، كل طرف بيكمِّل الطرف الثاني ويدعمه ويساعده إنه يتغلب على مشاكله، ميكونش حجر عثرة في سبيل إصلاحها..

" ربنا يصلح بيوت وأحوال المسلمين جميعا "