هل ممكن السفر عبر الزمن يحصل فعلاً؟
يا ما شفنا في الأفلام والقصص إن في ناس بيرجعوا للماضي أو يروحوا للمستقبل، بس السؤال: هل ده ممكن في الحقيقة ولا لأ؟ تعالوا نفهمها مع بعض وحدة وحدة.
الجانب العلمي
العلم بيقول إن فكرة السفر عبر الزمن مش خيال كامل، لكن برضه مش سهلة. في نظرية شهيرة اسمها النسبية العامة للعالم "آينشتاين"، بتقول إن الزمن والمكان مرتبطين ببعض في حاجة اسمها "الزمكان".
لو قدرت تتحرك بسرعة قريبة من سرعة الضوء، الزمن بالنسبالك هيعدي أبطأ من اللي واقف ثابت. يعني ممكن ترجع للأرض بعد رحلة وتلاقي الناس كبرت وانت لسه صغير! وده اسمه تمدد الزمن، واتجرب فعلاً في تجارب علمية على ساعات ذرية.
كمان في فكرة اسمها الثقوب الدودية، ودي زي أنفاق قصيرة بتربط بين نقطتين بعيد عن بعض في الكون، ولو عرفنا نفتحها ونسيطر عليها ممكن نعدي من نقطة لأخرى في لحظة، وده ممكن يخليك تروح زمن تاني. بس كل ده لحد دلوقتي مجرد نظريات، لسه ما تحققش عملي.
الجانب الديني
من الناحية الدينية، إحنا كمسلمين مؤمنين إن الزمن بيد الله، وهو اللي خلقه وهو اللي يتحكم فيه. في القرآن الكريم فيه قصص بتلمح لفكرة مختلفة شوية عن الزمن، زي قصة أصحاب الكهف اللي ناموا سنين طويلة وصحوا لقوها كأنها يوم أو بعض يوم. وكمان قصة عزير لما أماته الله مائة عام ثم بعثه.
دي كلها آيات بتورينا قدرة ربنا على التحكم في الزمن للبشر بطرق خارقة، لكن ده بيكون بأمر الله ومعجزة، مش عن طريق آلة أو تجربة علمية. فحتى لو العلم قدر يعمل حاجة شبه كده، فهي هتحصل بإرادة ربنا وفي حدود اللي هو كاتبه.
الجانب الفلسفي
لو افترضنا إن السفر عبر الزمن بقى ممكن، السؤال: هل نقدر نغير الماضي؟ لو غيرناه، هل هنأثر على الحاضر والمستقبل بطريقة خطيرة؟ دي مشكلة اسمها مفارقة الجد، لو مثلاً حد رجع للماضي ومنع جده من الجواز، يبقى هو نفسه مش هيكون موجود!
عشان كده في ناس بتقول إن السفر للمستقبل أسهل وأأمن من الماضي، لأنك مش هتلعب في أحداث حصلت خلاص.
الخاتمة
في الآخر، السفر عبر الزمن حلم كبير للبشرية، والعلم بيحاول يقرب منه خطوة خطوة. بس سواء وصلنا ليه أو لأ، الحقيقة إن الزمن حاجة غالية، وكل لحظة فيه مش هترجع. فالأذكى إننا نستغله صح ونعيشه بأفضل طريقة.
وزي ما الدين علمنا: "اغتنم خمسًا قبل خمس"، ومنهم حياتك قبل موتك، وفراغك قبل شغلك. يمكن ربنا ما يخليناش نسافر عبر الزمن، لكن مدينا القدرة إننا نصنع مستقبل أحسن من دلوقتي.
سؤالين ليك يا تري لو اخترعوا الاله الزمنيه هترجع للماضي عشان حاجه ندمان عليها و نفسك تغيرها ولا هتروح المستقبل تشوف نفسك عايز اسمع رأيك
