انا مش مهزوم
مشيت خطاوى الزمن
ازرع بذور الامل
اغزل كلام العشق
غنى ومواويل
سقيت كل القلوب من قلبى حنيه
هديت كل العيون من عينى اغنيه
زى شجرة خير والكل حواليا
يقطف ثمار خيرى
مشيت ومشوارى طويل
اداوى غيرى وقلبى عليل
وكلى جروح
وروحى تروح تداوى جراح غيرى
ودارت الايام و الكل نسيونى
وتاهت بين الزمن كل عنواينى
وبقيت وحيد
ونار الوحده تكوينى
احزانى ساكنه
كل ملامحى وتكوينى
وحيرتى من اللى فات
ماليه كل تفاصيلى
ودمعتى ع اللى حصل
متحجره فى عينى
وبسمتى من زمان مفارقه
وحالفه ماتجينى
يا قلبى تعالى خليك بين الضلوع
مالك حزين مهموم
من بين الضلوع مخلوع
عارف انى ظلمتك
ومن الجميع مخدوع
قلبى وانا عارفك
يا قلبى يا موجوع
نبضك كله ألم
ودمك كله دموع
تعالى نبعد و نتباعد
عن كل اللى خان وباعك
ونداوى كل اوجاعك
وحياة خيرك و ودك
لنبيع كل اللى باعك
ونعيش من تانى الزمن
زى ما كنا زمان
من غير جرح وألم
من غير أسى وحرمان
وحدتك جنتك مش نار
وفراقهم .. اسلم قرار
اصل اللى باع يتباع
بارخص الاثمان
صدقنى خلاص
فكيت كل القيود
وطريق العشم خلاص مسدود
وبيت الود خلاص مهدود
وحياتك يا قلبى الغالى
هنرجع نعيش من تانى
من غيرهم احلى الايام
من غيرهم تحلى الاحلام
من غيرهم يرتاح البال
يبكوا علينا دموع الندم
من غيرنا يحسوا الالم
من غيرنا صبحم ايتام
وانا مش مهزوم
هبنى من تانى احلامى
وهاقدر اقوم
وجوا بحور احزانى
هاسبح .. و اعوم
وارجع للشط من تانى من غير هموم
وانا مش مهزوم
هاعيش من تانى فى العالى
وانسى الواطيين
قلوب مش صافيه يا غالى
ومش سالكين
اموات م الحقد والغيره
دول مش عايشين
وفى سيرة الناس بنميمه
دايما ماسكيين
من طوب الوهم والحيره
لقصور بانين
قصورهم توهه ومتاهه
فيها تايهين
هاهجرهم هجر ه بلا عوده
وانا هجرى جميل
واحضن ايامى من تانى
و أقول مواويل
وانا مش مهزوم
قسما من تانى يا ايامى
ما هاعيش مظلوم
يهون الكل من بعدى
وانا عمرى ما اهون
رجوع الود من تانى
ابدا ما يكون
