أشعار غنائية بالعامية المصرية

يعتبر الشاعر الغنائي أحمد عطا. من أهم الكتاب المعاصرين للأغاني الدرامية للمسرح المصري، حيث كتب العديد من الأغاني لفرق مسرحية من مختلف محافظات جمهورية مصر العربية، وقد حقق العديد من الإنجازات في هذا المجال، حيث حصل على جائزة المهرجان القومي للمسرح المصري عن أفضل أشعار، وذلك في الدورة التاسعة للمهرجان عام ٢٠١٦، كما حصل في نفس العام على جائزة أفضل أشعار بالمهرجان الختامي للفرق القومية للهيئة العامة القصور الثقافة، وغير ذلك العديد من الجوائز والكريمات التي تجعل منه واحدا من أهم الكتاب المتخصصين في كتابة الأغنية الدرامية والمسرح الشعري في مصر. 

ومن أعماله ما يلي :

قصيدة/ البدلة
...........
لسَّاك ما بين الأوليا حيران
تايه ما بين الشكوى والأمنيَّة
عمال تطرطش سِرَّك الحمضان
بس اللسان مش ترجمان النِيَّة
مدااااااد 
بتقولها 
وتستناها
وتتباهى بكل مظاهر التضحيِّة
نشرت غسيلك الدايب على الناصية 
مشمَّر كمك المقطوع
وشايل بدلة الزفة
وبتطلعها من كيسها بقلب ضعيف
عشان تطلع يا دوب لفَّة
بتكويها بنار الحوجة واللهفة
فتلسع جلدك اللي معدش بيقول لك
وتلبسها فتدفَّا 
يا دوب حبَّة
وتتغير 
وبتأير 
من المسمار ليخرقها
قانون الدنيا خرتقها
قِدمت ودابت البدلة
وبِعت الشبكة والدبلة
في ناس هبله
ولسه الحلم بيزغزغ ف أفكارها
بيوعدها النياق الحمر بالزوفة
هتيجى تنخ تحت رجولهم المهرية
تكون مهر الهنا الأبدي
تكون أغنية
تدندن بُكره بالراحة
وبصراحة
أنا بطلت أحلامي
وعايز اعيش
بلا ناقة ولا أحلام
آكل أشرب وأخُش أنام
لحد ما اموت. 

……… 

ومن كتاباته أيضا:

قصيدة/ الشقلباظ

الخوف. بيحجب عن عنينا الشوف.
والصمت لغة المخلصين يا خروف.
والهات وهات، وزحمة الأزمات
خرمت جيوبنا وهبشت المصروف.

الحب. كلمة بتخدع المحبوب.
والكُره. مش سُكَّر، وصعب يدوب.
واللي انحنى لاجل الأمور تتلم
هيعيش يلم وللأبد مركوب.

الطيبين. مش أبرياء ولا طين.
لولا طيبتهم. ما اتملعنوا الملاعين.
وازاي هنعتب ع اللي ماشي شمال
طول ما اليمين زاحفين ومش لاقيين؟

الداء. يصيب الشهم والأندال.
والطب مش رحمة. الرحمة بالأموال.
فلو معاك تركب ترولي تعيش
ولو مفيش. على الكتاف تتشال.

الهيصة مش مقتصرة ع الأفراح.
والطبل واجب ع الجميع ومباح.
والنوح في عز الجرح مش مسموح
امسك صاجات الشقلباظ  ترتاح.
.........
 ونختم المقال بعمل ثالث لنفس الشاعر وهو:

قصيدة/ موج البحر . 

يا موج البحر
ياريت  ترسى بقا وتثبت على وضعك
كفايه يا بحر . 
ف إيه جاى ،  ف إيه رايح 
وباعت موجك السايح . 
يغازل أحلى حوريه ، ويحضنها ويرجعلك
.
أمانه يا بحر .  ما دام قادر كدا  وواصل
تخلي الحلوه تتواصل
وتبعت موجتك العااااليه
تدوبنا بدون فاصل
.
يا بحر حرام
أنا اللى تملى باندهلك توصيها
تعبت غرام
بغير منك عشان موجك مغطيها
واموت م الغيره لما الرمله تتسخن بنار قلبي وتحضنها تدفيها
.
يا بحر ياريت
تحس بقلب  بيحايلك
وتتكرم
وتبعت قلبي ف رسايلك
واعيش عمرى أغنيلها واغنيلك
وتلقانى 
تملى بحن وارجعلك
.
يا موج البحر . 
ياريت  ترسى بقا وتثبت على وضعك
كفايه يا بحر . 
ف إيه جاى ،  ف إيه رايح 
وباعت موجك السايح . 
يغازل أحلى حوريه ، ويحضنها ويرجعلك