امى ست الكل (اغلى الحبايب)
اعزائى القراء أسعد الله اوقاتكم بكل خير وسعادة
سوف نتحدث اليوم عن ( الأم )
سأسرد لكم قليل من كثير عن الأم وعظمتها ببعض الخواطر والكلمات
لأننا لو كتبنا عنها ألاف الكلمات ما اعطيناها حقها
حقيقى وجودها نعمة فى اى بيت وست الكل بدون منازع
واجمل حاجه في الدنيا وتتمنى تشيل عنك كل وجع وهى تتألم
بس عشان انت تكون كويس ومبسوط وبخير
كتبت هذه الكلمات من القلب اتمنى ان تدخل قلوبكم ...
ربنا بيرزقنى وراضى عنى عشان رضاكى
يا أجمل حاجة في الدنيا
هو فية في الدنيا اصلا جمال غيرك
بزعل اووى لو ثانية مرت وانا مش معاكى
وتدعيلى وافرح واقولك كتر الف خيرك
تيجى الشمس جنبك اية
ده انتى نورك غطى الكل
ده انتى عينى يا ست الكل
يا بركة بيتنا من غيرك هنعمل ايه
لما تضحك تضحك الدنيا معاكى
يا احلى حاجه في كل حاجه
روحى ودمى يا امى فداكى
يا غالية يا احلى عنوان للسعادة
بدأتى الرحلة وشيلتينى في بطنك شهور وايام
تعبتى يا امى واتحملتى ياما آلام
ومهما اوصف مش هوفيكى يا امى كلام
وجيت الدنيا يا امى وقلقت راحتك
اعيط واصرخ ويطير من عينك النوم
وفضلت اكبر يوم ورا يوم
وكان احلى حاجه علي قلبك
ده يوم دخولى المدرسة كان احلى عيد
كان احلى فرحة بالنسبة ليها
ساعات من عمرى فاكرها ومش ناسيها
الواد الصغير اللي قد الكف خلاص كبر
وتقولى يا رب اشوفك متهنى وسعيد
ومرت الايام يا امى وانتهت الدراسة
أخدت الشهادة ودخلت جيش
فضلت تعيط وتقولى من غيرك مش هعرف اعيش
قولتلها ادعيلى يا اما انا هخدم بلدى
عشان خاطر الكل يعيش
عدى الوقت في بعادك سنين
وكنت ادعى ربنا يقدرنى
وعلي غيابك يصبرنى
اصلك بالنسبة ليا اكسجين
فية حد يقدر يعيش من غير ما يتنفس
انتى بالنسبة ليا النفس والروح
ومهما زادت الدنيا جروح وهموم
بدعوة منك كانت تزول وتروح
ندرا عليا يا امى اشيلك على راسى
يا نور العين والقلب يا شجرة حب
يا احلى الناس واجمل ناس
واغلاهم واحلاهم واجدعهم
فاكر يا امى ومش ناسى
ربنا يخليكى لينا
ويبارك فى عمرك
ويديكى من الفرح فـداديـن
ويسعد قلبك يا امى سنين وسنين
اللهم سخر لأمى ملائكة تحميها من كل مكروه وسوء
اللهم بارك لنا في امهاتنا جميعا يا رب العالمين
الى هنا نكون انتهينا اعزائى القراء
الى اللقاء في المقالات القادمة
