يا مسافر بعيد
كتير أزواج بيسافروا عشان لقمة العيش وعشان أهل بيته مينقصهمش حاجه. البعد دا بيكون فيه وصال واتصال ، فيه مودة وشوق ولهفه ليهم .
لكن لما يكون السفر ده كأنه هجرة ؛ انقطاع وضياع ، جفا وقسوة وعدم سؤال بدون أي عذر .! حرام
آهات زوجه لم تتزوج
يا مسافر بعيد وسايبنــــي
لسيوف الكآبة تصيبنــــي
والفُرقه اللي بينا دمــــوع
في الوحده اللي بتدوِّبنـــي
يا مسافر بعيد وسايبـنـــي
الوِحده حقيقه ف كدبــــه
احساس القلوب مش لعبه
بتسافر وانا اللي في غربـــه
وعيون الحيطان تراقبنـــي
يا مسافر بعيد وسايبـنـــي
أحضان الفراغ ضمَّانـــــي
و عيون الزمان شيفانــــي
وأنين السنين بـيـعانـــــي
من ألمي اللي بيعذبـنـــي
يا مسافر بعيد وسايبـنـــي
بتمنى فراقنـــــا يـــــزول
بتمنى الوصال علطـــــول
بتمنى الحجارة تقـــــــول
ما تسيب الجفا وجاوبنــي
يا مسافر بعيد وسايبـنـــي
غرقانه و جراحي بحـــــور
وقساوة حبيبي صخـــــور
وشراع النجاه مكســــــور
والموج الغريق يسحبنـــي
يا مسافر بعيد وسايبـنـــي
بتشوف السلام في بُعــادي
و بشوفك أمير لفـــــؤادي
و صراخ الحنين بينـــــادي
على قلبك وهوّا تاعبنـــــي
يا مسافر بعيد وسايبـنـــي
ليه ديماً شايفني امبــــارح
و تفاهم ملهش ملامـــــح
ليه ديماً لسانك جــــــارح
و كلامك غُنا بيطربـنــــــي
يا مسافر بعيد وسايبـنـــي
آه كلمة من حرفيـــــــن
آه دي مودياني لفيـــــن
ولا سكتت دموع العيــــن
في ضميري اللي بيأنبنـــي
يا مسافر بعيد وسايبـنـــي
فكرت ف عذابي كتـيـــــر
وشرودي مع التفكيـــــــر
قررت وياريت ما يصيـــــر
وظنون الشطان تغلبنــــي
يا مسافر بعيد وسايبـنـــي
لو عينك تشوف أحزانـــي
لو قلبك يعيشها مكانــــي
لو عشت ف جحيم بركاني
هتشوف الفراق شيِّبـنـــي
يا مسافر بعيد وسايبـنــي
لو تعرف حنيني إليـــــــك
والشوق بيساومني عليــك
لو طوق النجاه بإديــــــك
هختار الهلاك يسلبنــــــي
يا مسافر بعيد وسايبـنـــي
يا مسافر بعيد وسايبني
﮼نبضقلبي ﮼
﮼الخوليأبوعمر ﮼
10 مارس 2023
هذه القصيدة تعبر عن حياة إنسانة مصرية بشكل دقيق ، شابة لم يتخطى عمرها السابعة والعشرون ولها بنتين في الثامنة والرابعة من عمرهم .
يعشون معاناة بعد الزوج والأب بلا اتصال بهم ولا سؤال عليهم ، فكل ما يزيد عن ثلاثة أشهر يقوم باتصال هاتفي بهم ، في حين أنه متواجد دائم على شبكات الإنترنت في غرف الدردشات والألعاب الجماعية ، ولكن حينما يقسو القلب فلا تسأل ولا تعاتب.
وا أسفاه على قلوب تحجرت وقلوب تفجرت و رحم قد قطّعت.
نسأل الله لنا ولكم السلامة والعافية.
