بيع العربيه بتوكيل جريمه يعاقب عليها القانون
من الموروثات الإجتماعيه الفاسده هو بيع العربيه وشرائها بتوكيل وذلك لتوفير ثمن رسوم نقل الملكيه في الشهر العقاري ،وأيضا بحجة الاستفاده من المده المتبقيه في رخصة العربيه.
للأسف عزيزي المواطن التوكيل لايثبت البيع ولا الشراء للسياره لأن القانون حدد للسياره طريقه واحده لنقل ملكيتها هي تسجيل عقد البيع في الشهر العقاري.
وللأسف أيضا عقد البيع العرفي لا يثبت أيضا نقل الملكيه عشان لو عايز تعمل حويط وتقول أنا هامضي المشتري على عقد بيع بيني وبينه والمشتري بعد كده ينقل الملكيه براحته في الشهر العقاري أحب أقولك عزيزي المواطن انك بتبص تحت رجليك وهتودي نفسك في داهيه لو بعت أو إشتريت العربيه بتوكيل .
- وفيما يلي سوف أذكر أهم المشكلات القانونيه اللتي يقع فيها البائع أو المشتري عند بيع العربيه بتوكيل :
- أولا/المشكلات اللتي يقع فيها البائع عند بيع العربيه بتوكيل.
المشكله الأولى:
لو عملت التوكيل المعروف في السوق ببيع العربيه للنفس وللغير وطبعا المشتري ماجددش رخصة العربيه وباع العربيه للغير والغير باعها لغيره وماحدش فيهم جدد رخصة العربيه قاعدين يبيعوها بتوكيلات عن طريق شهادات بيانات من المرور لأن الرخصه منتهيه .هنا أحب أبشرك عزيزي البائع إنك هايتحكم عليك بجنحة تبديد لوحات معدنيه عقوبتها تصل إلى ثلاث شهور حبس لأنك أمام الحكومه انت لسه مالك العربيه لأنك مانقلتش ملكيتها في الشهر العقاري ،وده غير بهدلتك في المحاكم وعمل معارضه وتخليص ورق من المرور غير إن الفيش بتاعك هايبقى فيه قضيه عايز تمسحها عشان عايز تسافر أو عايز تشتغل وتطلع فيش فاللي جناب معاليك وفرته في رسوم تسجيل العربيه في الشهر العقاري هاتدفع قده أضعاف مضاعفه للمحامين .
المشكله الثانيه:
لو قام المشتري بإرتكاب أي جريمه بعربيتك (قتل عمد أو خطأ ،سرقع،عمليات إرهابيه) هنا العربيه أمام الحكومه بإسمك إنت وإنت المسئول لإنك للأسف مابعتش العربيه بعقد مسجل وبعتها بعقد عرفي بس للأسف انت ماتعرفش أن العقد العرفي لا يثبت إستلام المشتري للعربيه لأن القانون حدد لنقل ملكية العربيه عقد مسجل في الشهر العقاري وكمان حدد إنك تمضي المشتري على إقرار في نفس العقد بإستلام العربيه في ساعته وتاريخه .
فيا عزيزي البائع لو المشتري مارضيش يدفع رسوم الشهر العقاري بحجة إن العربيه لسه رخصتها ساريه ولازم أستفيد بالمهله دي حرااام إدفعها انت وخلص نفسك من المصائب اللي هاتحصلك.
ثانيا/المشكلات اللتي يقع فيها المشتري عند شراء العربيه بتوكيل.
المشكله الأولى:
عزيزي المشتري أحب أقولك إن عقد البيع الابتدائي العرفي للعربيه لايثبت نقل الملكيه . وللأسف من الموروثات الشعبيه إن المشتري يطلب من البائع عمل توكيل بالبيع للنفس وللغير عشان المشتري حويط😂 يطلب من البائع كتابة عقد إبتدائي إنه إشترى السياره وبعد كده المشتري يتفاحئ بأن البائع نصاب وباعها لأكثر من شخص ورااااحت فلوسك ياصابر عشان جناب معاليك عايز توفر فلوس تسجيل العربيه في الشهر العقاري .
المشكله الثانيه:
لو مات البائع كده التوكيل إتلغى بقوة القانون وياسلام لو البائع ده عنده ورثه وقُصَر هنا العربيه هاتدخل مجلس حسبي وحِلني لو عرفت تنقل ملكيتها أو تثبت إنك صاحبها لإنك للأسف تقاعست في تسجيل عقد العربيه في الشهر العقاري وهنا هاتضطر تشتري العربيه مره تانيه من الورثه بفلوس في قيمتها في السوق وزياده كمان وتحت إشراف النيابه الحسبيه ،أو تستعوض ربنا فيها لأن العقد العرفي اللي معاك لا يثبت نقل الملكيه.
وإلى اللقاء في مقالات أخرى والسلام عليكم ورحمة الله وبركاته.
