تقرير الجسات والأعمال الترابيه
تقرير الجسات
بسم الله والصلاه والسلام على معلم الناس الخير , وبعد :-
- يعنى أيه " تقرير جسات" ؟
- مين اللى بيعمل تقرير الجسات ؟
- أمته بعمل تقرير للجسات ؟
- إزاى بعمل تقرير للجسات ؟
- أنواع إختبارات التربه ؟ أيهم الأفضل ؟
- أسواء أنواع التربه فى الإنشاء ؟
- طب عمق الجسه بيتحدد بناءاً على أيه ؟
- وأيه هى الإحتياطات اللى بأخذ بها عند عمل تقرير الجسات ؟
- كمهندس تنفيذ ... أيه هى المعلومات المهمه فى تقرير الجسات ؟
كل الأسئله دى إن شائء الله هنعرف إجابتها بعد شويه .." تابعونا "
بدايةً شكر وتقدير للمهندس / عبدالرحمن الشرنوبى .
1- يعنى أيه " تقرير جسات" ؟
معنى كلمه "جسات" إن بأخذ عينات من التربه على أعماق مختلفه والعينات دى بعملها إختبارات وتحليل علشان أعرف خصائص التربه اللى هنفذ عليها , وبرضوا بحتاجها فى تصميم الأساسات لان مينفعش أخش عميانى .
2- مين اللى بيعمل تقرير الجسات ؟
اللى بيعمل تقرير الجسات هى جهه تكون معتمده من ( المالك + الاستشارى + المقاول العام ) , وممكن تكون الجهه دى هى كليه الهندسه من أحد الجامعات أو مكتب أحد الدكاتره الجامعيين .
3- أمته بعمل تقرير للجسات ؟
بعمل تقرير الجسات مرتين , الأوله بيكون أسمها جسات إستكشافه ( إسترشايه ) ودى ممكن يعملها المالك مثلاً لما يشترى الأرض أو قبل ما يفكر يعمل مشروع , والمره التانيه بيعملها المقاول لعام وبيكون إسمها جسات تأكيديه على الجسات اللى عملها المالك , وفى كتيب مواصفات الأعمال الترابيه بيقولك إن الجسات اللى بتعملها لها صلاحيه إستخدام شهرين فقط .
4- - إزاى بعمل تقرير للجسات ؟
بيكون مع الجهه اللى هتعمل الجسات عده الحفر وهى عباره عن عربيه نص نقل عليه شاسيه وفيه مواسير صغيره واللى بها بأخذ الجسات وبيكون قطر المواسير فى حدود 15 سم , وبحدد عدد الجسات بناءاً على مساحه الموقع مع الأخذ فى الاعتبار إن أقل عدد جسات = 2 , لغايه ما توصل مساحه الموقع ل 300م2 وبعد كدا كل 300م2 بزود جسه وتكون الجسات متوزعه على كامل مساحه الأرض , وعند الحفر بأخذ عينه كل واحد متر حفر .
5- أنواع إختبارات التربه ؟ أيهم الأفضل ؟
بالنسبه لإختبارات التربه ففى إختبارات معمليه أى بتتعمل فى المعمل بحيث إن بأخذ العينات واروح احللها فى المعمل , وفى إختبارات حقليه ودى اللى بيتم إجراءها فى الموقع وبالتالى فهى الافضل لان بكون ضامن إن خصائص التربه محصلش فيها تغيير وبالتالى هتكون النتائج أكثر دقه من الإختبارات المعمليه.
6- أسواء أنواع التربه فى الإنشاء ؟
والتربه دى هى التربه الانتقاشيه وده لانها بتكون تربه قصفه وصلبه (يعنى كويسه ) ولكن لما تتعرض للميه بيحصل لها إنتفاش أى حجمها بيزيد وده بيؤثر بالسلب على الأساسات .
7- طب عمق الجسه بيتحدد بناءاً على أيه ؟
بيتحدد عمق الجسه تبعاً لوزن المنشئ اللى هيتم تنفيذ , بمعنى إن مينفعش أعمل جسات بعمق 10م ويكون وزن المنشئ هيؤثر حتى 30م , ولذلك كلما زاد وزن المنشئ كلما زاد عمق الجسه .
8- وأيه هى الإحتياطات اللى بأخذ بها عند عمل تقرير الجسات ؟
وبتكون الإحتياطات هى :-
- أقل عدد جسات =2
- لو التربه غير متجانسه بزود عدد الجسات.
- يتم توقيع أماكن الجسات داخل حدود الملكيه وليس حدود المبنى.
- لا يقل عمق الجسه عن 10م .
- معاينه الموقع ومعرفه تاريخ عمل أخر جسات للموقع.
9- كمهندس تنفيذ ... أيه هى المعلومات المهمه فى تقرير الجسات ؟
1- نوع التربه .
2- قدره تحمل التربه ( bearing capacity ).
3- نوع الأساسات المنفذه & منسوب التأسيس.
4- طريقه سند جوانب الحفر .
5- منسوب المياه الجوفيه وطريقه النزح.
