فن التغافل : إزاى تعيشى مرتاحه؟
فن التغافل:إزاى تعيشى مرتاحة؟
فى وسط الضغط والإنشغالات اللى بنعيشها كل يوم ،بنقابل مواقف بنكون فيها عايزين نستخبى فى اى حته ! موقف بايخ من صحابك ،كلمه ضايقتك ،ولو جيت تعاتب هتتضايق اكتر عشان ممكن يتقلب عليك الترابيزة فعلشان كده لازم نختار المعارك اللى ندخل فيها عشان ماتحرقيش فيها طاقتك وخلاص ولو ركزت فى كل حاجه مش هتعرفى تعيشى يا ست البنات وهنا بيجى الكنز اللى اسمه “التغافل ”.
“ التغافل مش بس بيغير حياتك للأحسن ،ده كمان بيغير حياة كل اللى حواليك للأحسن ”
طب ازاى تفرقى بين التغافل والضعف يا ست البنات؟
التغافل:شخص بيعرف يسيطر على نفسه، وبيكون عارف يرد على الإهانة بس بيختار انه يكبر دماغه ويشترى راحه باله، على سبيل المثال انتى وصاحبك قاعدين فى كافيه و واحده منهم رمت إفيه بايخ عليكى انتى فهمتي إنها قلت ذوق منها، وتقدري تاخدي حقك..بس اختارتى تبتسمي وتعديها عشان متديهاش اكبر من حجمها و تقعدى باقى القاعده مبسوطه .
الضعف:شخص بيكون مش عارف او خايف اصلا يرد على الإهانة ،وغير كده وكده بيقعد ياكل فى نفسه على سبيل المثال انتى وصحابك قاعدين فى كافيه و واحده منهم رمت إفيه بايخ عليكى راح وشك جاب ألوان، ودخلتى الحمام قعدتى تعيطى وتقولى لنفسك:" انا ليه مردتش عليها؟
اللى بيتغافل بيقول لنفسه :'انا اقدر اخد حقى وارد بس الموضوع مش مستاهل '..أما الضعيف بيقول لنفسه:'انا كنت نفسى ارد بس خايف'.
إمتى بيكون التغافل غلط ؟
- لما الشخص يتمادى ويستغلك : هنا لما تعدى مره واتنين وتلاته وسورى يعنى فاكرك عبيطه ومش فاهمه؛ ساعتها بقى تقولى استوب وتوقفيه عند حده عشان ل عديتى تانى هيدوس عليكى اكتر
- لما تتهانى قدام الناس: لو حد جرح كرامتك قدام الناس او حسيتى بأي نوع من الإهانة اوعى تسكتي ،السكوت هنا بيصغرك وبيفتكر انك خايفه منو
- لما الموضوع يمس حياتك الشخصيه: بمعنى لو التغافل ده هيدخلك فى خطر على عيالك او يضر شغلك ؛ السكوت هنا استهتار مش حكمه خالص
'التغافل شطاره .. تطنشى اللى ما يستاهلش ،ووقفى اللى فاكرك مش فاهمه'
إزاى تطبق “فن التغافل "بذكاء ؟
التغافل فى العلاقات ده حاجه مهمه اووى مثلا لما صاحبتك تشوف الماسدج بتاعتك و ما تردش عليكى ،أو تعمليلها منشن لحاجه معينه وتطنش .. إلتمسى ليها العذر خصوصًا لو العلاقه بينكم قويه ،الحياه مليانه مشاكل وكل واحد عنده ابتلاء معين فى حياتوا فإنتى متعرفيش ظروفها ايه مخليها مش مركزة فى اى حاجة غصب عنها ،ومش كل الناس بتحب تشارك مشاكلها مع حد حتى لو قريب منها ؛ ساعات الواحد بيرتاح لما يسكت وينعزل شويه ولا بيقدر يرد ولا يعمل أى حاجه غير انو هو ييقعد مع نفسه شوية، وممكن صاحبتك تكون مش فاضيه وعندها شغل وتقولك هكلمك لما أخلص واليوم يعدى وتنسى بس تيجى اليوم اللى بعده تقولك “حقك عليا واللة كنت مشغولة ” طالما اتأسفت و قدرتك وخافت على زعلك خلاص عديها،أصل احنا عايزين ايه غير يكون فى حياتنا شخص حنين ،'الحنيه دى سر نجاح أى علاقة 'بتخلى العلاقة تبقى أسهل وهى السحر اللى ببتخلى اى صداقة تستمر أو أ ى علاقة تكون صحيه ، وطبقى ده فى اى حاجه فى حياتك مع قرايبك وكلامهم البايخ او تعلقيهم المستفز على شكلك، إوعى تتعصبى عشان هما اصلاً عايزين يوصلوكى للمرحلة دى ،ساعتها ردى بإبتسامه وقولى “ الحمدلله والله انا راضيه ” الرد ده هيخليهم يفكروا تانى فى اللى قالوه و هيكتمهم ،مع أهلك بقى دول وضع تانى بالذات باباكى ومامتك عشان اى كلمه يقولوها بتضايقك بيكون مش قاصدهم من خوفهم عليكى بيقولوا كده ، ساعات الأم بتنتقدك على لبسك أو تصرفك وهكذا “هل هى كده بتخنقك وكده"؟! لا خالص دى اكتر واحدة عايزاكى أجمل واحده فى الدنيا بدل ما تقول “هى ليه دايماً بتقولي كده”؟ قوليلها “حاضر يا ست الكل هعملك كل اللى انتى عايزاه ” مش هتخسرى حاجه لما تقولى كده ده بالعكس هتحسى انك كسبتى الدنيا كلها بسبب إنها راضيه عنك، ومتحاوليش تكسبى النقاش مع باباكى ومامتك حتى لو حصل إيه ، اللى عايزه اقوله ليكى من ده كله الحاجه اللى هتعرفى تعديها من غير ما تيجى على نفسك عديها عشان تريحي دماغك ،وأهم حاجه راحتك النفسية كل واحد بيفكر فى نفسه وكل واحد بردو بيشيل شيلته يا ست البنات.
إزاى تتدربى على “فن التغافل”
لما تلاقى اللى قدامك قال كلمه استفزتك ولسه هتردى عليه بزعيق فرملى بسرعه ‘وخدى نفس عميق وطلعيه براحه ’ و اسكتى لمدة ١٠ ثوانى ده بيخلى مخك يشتغل بدل ما الجزء المنفعل (العاطفه) هى اللى تشتغل ،بعدين هتلاقى نفسك فكرتى و رديتى بهدوء من غير ما تحرقى دمك .
‘ افتكرى دايمًا ان كلام الناس بيعبر عنهم هما مش انتى خالص ..أنتى اكبر من إن كلمه تهز ثقتك بنفسك’
" خلاصه القول ،التغافل عمره ما كان ضعف ،بالعكس ده قمة الشجاعة وضبط االنفس ،الحياة أقصر من إننا نضعيها فى الزعل والتدقيق على كل موقف ،احمى صحتك النفسية وافتكرى دايمًا إن راحه بالك أهم بكتير من إنك تكسبى كل جدال واشترى سلامك الداخلي وركزى فى حياتك ،وسيبى الكلام الفاضى يمر من غير ما يسيب أثر فى قلبك.
الرجاء تسجيل الدخول لتتمكن من التعليق