ليه الجسم بيخزن الدهون في أماكن معينة بس؟
ليه الجسم بيخزن الدهون في أماكن معينة بس؟
ليه بعض مناطق الجسم بتخس بسرعة والتانية بتفضل زي ما هي؟
كتير مننا لما بيبدأ يلتزم بنظام غذائي قاسي، أول حاجة بيلاحظها إن وشه وذراعاته أو مناطق هو مش متضايق منها أصلاً هي اللي بتخس الأول. وعلى الجانب الآخر، الكرش والجناب والأرداف بتفضل زي ما هي وما تتحركش. الموضوع ده بيخلي ناس كتير يجي لها إحباط وتحس إن الجسم بيعاندها، أو إن يبقى في حاجة غلط في النظام اللي هم ماشيين عليه. والسؤال اللي بيطرح نفسه: هو ليه الجسم مش بيوزع الدهون بالتساوي؟ ليه في مناطق محددة كده الجسم بيركز فيها كل الدهون وبيرفض إنه يتخلى عنها؟
إيه دور الجينات الوراثية في تحديد أماكن تخزين الدهون؟
علشان نفهم ليه الدهون بتتخزن في مناطق معينة ومناطق تانية لأ، محتاجين نرجع للأساس: الجينات الوراثية اللي كل واحد مولود بيها. الشفرة الوراثية اللي بناخدها من الأب والأم مش بس بتحدد لون العين أو شكل الشعر أو حتى طولنا، بل إنها بتحدد خريطة توزيع الخلايا الدهنية في الجسم. الدكاترة والمختصين في دراسة السمنة وتوزيع الدهون اكتشفوا إن في مجموعة من الجينات مسؤولة بشكل مباشر عن تحديد شكل الجسم وإيه هي المناطق اللي الدهون هتتخزن فيها، وطبعاً بتختلف من شخص للتاني.
وده ممكن نلاحظه لما نلاقي عائلات كاملة شكل جسمها كلهم قريب من بعض. الجينات هي اللي بتحدد عدد الخلايا الدهنية في كل منطقة في الجسم، وكل إنسان بيتولد بعدد معين من الخلايا الدهنية. فلما بيبدأ وزنه يزيد، الخلايا حجمها بيكبر وتتملي بالدهون. بس المشكلة بقى إننا ما نقدرش نغير الشفرة الوراثية بتاعتنا. يعني لو جيناتنا متبرمجة إنها تخزن الدهون في الجناب، أول ما هناكل سعرات حرارية زيادة، الجسم هياخد الزيادة ويجري على طول يخزنها في الجناب. وده بيفسر ليه ممكن تلاقي اتنين بياكلوا نفس الأكل، وزنهم بيزيد قد بعض، وشكل جسمهم مختلف تماماً.
هل الجينات هي العامل الوحيد؟ وإيه دور الهرمونات؟
لكن برضه الجينات مش بتشتغل لوحدها. الجينات بتحتاج قائد ينفذ العمليات دي على أرض الواقع. والقائد ده له دور كبير في عملية توزيع الدهون. والقائد ده هو الهرمونات. لو اعتبرنا إن الجينات هي الخريطة أو التصميم الهندسي للجسم، فالهرمونات هي العمال والمهندسين اللي بيبنوا وبيوجهوا كل حاجة لمكانها. الهرمونات الجنسية بتلعب دور البطولة في تحديد الأماكن اللي الجسم هيقرر يحوش فيها الدهون. وطبعاً في اختلاف جذري بين الستات والرجالة في الموضوع ده.
إيه الفرق بين الرجالة والستات في توزيع الدهون؟
فهنلاقي عند الرجالة مثلاً الهرمون المسيطر هو هرمون التستوستيرون. الهرمون ده بيدي أوامر واضحة للجسم إنها تخزن الدهون الزيادة في منطقة البطن، وتحديداً حوالين الأعضاء الداخلية. وعلشان كده أول ما الراجل وزنه بيزيد، الكرش بيروح مطرقة على طول. وده لأن التستوستيرون بيمنع تخزين الدهون في الأرداف والفخذين. كل الفائض بيطلع على الكرش على طول.
لكن لو جينا نبص عند الستات، هنلاقي إن الهرمون المسيطر هو الاستروجين. الاستروجين بقى بيخلي الدهون تتخزن في منطقة الأرداف والحوض والفخذين، وبيتجنب بشكل كبير إنه يخزنها في البطن، وخصوصاً خلال فترة الخصوبة. والسبب البيولوجي في كده، سبحان الله، هو إن جسم الست متصمم علشان يكون مستعد دايماً لعملية الحمل والرضاعة. تخزين الدهون في منطقة الحوض والأرداف بيحافظ على المساحة المخصصة لنمو الجنين في البطن. ده غير إن الدهون اللي في الفخذين بتعتبر كنز سعرات حرارية الجسم بيسحب منها أثناء شهور الرضاعة الطويلة.
إيه تأثير التوتر والكورتيزول على توزيع الدهون؟
والهرمونات دي بتفضل مسيطرة على توزيع الدهون طول فترة الشباب. لكن مع ذلك، ممكن تتعرض لضغوط خارجية تلخبط كل الحسابات. أكبر ضغط بيواجه جسمنا في العصر الحديث هو التوتر. واللي سببه بيفرز هرمون تاني خالص بيقلب كل الموازين. إحنا أصلاً كل يوم بنواجه زحمة ومشاكل ومسؤوليات ما بتخلصش. ضغوطات مادية، ضغوطات نفسية. وعلشان كده الجسم دايماً محطوط في حالة الاستعداد. والمسؤول الأول عن حالة الاستعداد دي هو هرمون الكورتيزول، أو زي ما بيتسمى هرمون التوتر. الكورتيزول هرمون مهم لأنه هو اللي بيفوقنا ويخلينا مستعدين لمواجهة الخطر. لكن لما بيفضل عالي في الدم فترة طويلة، بيبدأ يغير في شكل الجسم وتوزيع الدهون.
واللي بيحصل هو إنه لما الكورتيزول يزيد، بيبدأ يبعت رسائل طوارئ للمخ يقول له فيها: إحنا في خطر، ومحتاجين طاقة بسرعة علشان نهرب أو نحارب. والجسم وقتها بيستجيب للرسالة دي عن طريق إنه يسحب الدهون من الأطراف ومن الأماكن اللي مش مهمة قوي ويخزنها كلها في منطقة البطن. الكورتيزول العالي برضه بيعمل إعادة لتوزيع الدهون. يعني ممكن تبقى واحد وزنك مش زايد قوي، بس عندك ضغط نفسي شديد، فتلاقي دراعاتك ورجليك رفيعين وعندك كرش في نفس الوقت. والمشكلة الأكبر إن الكورتيزول بيفتح الشهية، وتحديداً للأكل اللي مليان سعرات حرارية عالية، زي السكريات والنشويات وغيرها، لأنها أسرع مصادر ممكن تدي لك طاقة وتهدي حالة التوتر. فاللي الكورتيزول عنده عالي، بيلاقي نفسه بياكل كتير. والجسم بياخد الأكل الزيادة ويخزنه في البطن زي ما هو.
