الست ملكة مش مكسورة

المراة ملكة وليست مكسورة

كل واحدة فينا ليها دور قوي في المجتمع بس في نفس الوقت مينفعش تهلك نفسها وهي بتأدي الدور ده مثلا فيه ربة المنزل واللي ممكن تكون في نفس الوقت بتشتغل عشان تساعد في مصاريف البيت بتنسى نفسها وانها ليها حياتها الخاصة عشان خاطر جوزها وولادها هي من واجبها تعمل كده وديننا امرنا بكده بس في الاخر مفيش حد بيشوف ده بيعارضو ان الست تشتغل فيها ايه لو اشتغلت هي بتعرف تعمل حجات كتير وتشتغل بكفاءة كبيرة وفي نفس الوقت بتعرف تحافظ على نفسها برة بيتها .

 الستات اصلا اما بيكون بيشتغلو في اي شغل بيأدوه باخلاص كبير وبيكونو متحمسين ليه زي التعليم برده البنات بتبقى متحمسة وهي بتتعلم عكس كتير من الولاد بس المجتمع بييجي عليهم ومش بيديهم حقوقهم طب حتى ليه مبنطبقش شرائع الاسلام اللي خلى المراة ملكة متوجة وبيديها كل حقوقها وبيحافظ على ورثها ومميزها عن الرجل في حجات كتير عمر ما الاسلام امر بضرب المراة الا في ابعد الحالات مش كل حاجة بسيطة تنضرب ومينفعش الست تسكت على نفسها كده هي ليها كرامة وكبرياء لازم تطلب المساعدة من اي حد لان في الاخر هي اللي هتتدمر ومحدش هينفعها في الوقت ده. 

 ده غير ان مجتمعنا عنده مفاهيم غريبة ان المراة المطلقة فيها عيب هي مكنتش مستريحة في حياتها ومش المفروض انها تفضل كده عشان خايفة من كلام الناس لان الناس مش هينفعوها وقتها ومينفش المجتمع يبصلها بازدراء او احتقار هي انسانة زينا لا فيها غلط ولا عيب بل هي اكثر نضجا من ستات لسه متجوزوش وكمان بيبصو نفس النظرة للمراة الارملة ده قضاء ربنا هي ملهاش اي دخل فيه ليه يتبصلها النظرة دي . 

الست مخلوقة ملكة والاسلام اللي قال كده بس هي اللي تخلي نفسها ملكة او تذل نفسها تخلي نفسها ملكة بانها تحافظ على نفسها باحتشامها ولبسها الواسع وحيائها محدش يقدر يبصلها انما لو عايزة تذل نفسها بلبسها الضيق ومكياجها الفاضح فاي حد بيبص عليه ومتقدرش تتكلم عشان لو اتكلمت هيجيبو الغلط عليها هي عشان لبسها وشكلها مع ان الغلط الاكبر على الراجل لانه اصلا مينفعش يعمل كده من الاول بس انتي اللي بتديله الفرصة .

 حافظي على نفسك وصونيها مفيش حد هينفعك ولا الولد اللي بتكلميه على التلفون لانه اصلا كده معنهوش ذرة نخوة او رجولة لو مدخلش من باب البيت فده مش هيحافظ عليكي ولا هيصونك وزي ما بيكلمك بيكلم غيرك متغضبيش ربنا ولا تضيعي ثقة اهلك فيكي عشان خاطر واحد اي ست ارجل منه بميت مرة .زي ما ليكي حقوق برده عليكي واجبات لازم تحترميها ومتضيعيش ثقة اهلك وترفعي راسهم بين الناس.

لازم تعرفي انك جوهرة ومش اي حد يستحقك لازم اللي تختاري تكملي حياتك معاه يكون انسان سوي وعارف ربنا وياخد بايدك للجنة لانه لو مش كده ميستحقكيش انتي مش سلعة هو بياخدها انتي ملكة لازم يحافظ عليها ويحترمها ويقدرها .ده غير انك اما تكوني لوحدك برده مش هتكوني ضعيفة مش لازم تخلي حياتك كلها معتمدة على راجل لان ممكن في وقت من الايام يسيبك عشان كده لازم تكوني مستعدة لاي ظرف من الظروف ده وتكون عندك حياة مهنية مستقلة ومتتنازليش عنها ابدا.