الونس وأهميته فى حياتنا
عوامل نجاح رحلة الزواج فى رأى زوجة مصرية مسؤولة من 25 سنة:
١-الاحترام
٢-الأدب في الخلاف والاختلاف
٣-المساحه الآمنه (الخصوصيه و الاشتياق)
٤-المسانده في الشدائد
٥-الونس
واقفوا بينا شويه عند لقطة الونس .. ده من اكتر الحاجات اللي بتخلي الجواز ممتع مقارنةً بأي علاقه طويلة المدي…
الأنس والصحبة من أساسيات الحياة
سيدنا آدم رغم انه كان عايش في الجنة اللي مليانة بالنعيم والنعم …لكنه كان حاسس بالوحشة والوحده وافتقاد (الونس).. أكتر شعور كان حاسس بيه قبل ما ربنا يخلق أمنا حواء هو الوحده.
وربنا برحمته وكرمه خلق له الأنس والصحبه والرفقه في صورة إمرأه ♥️
(الونس) إحتياج مهم جدا لاي انسان… وأحد أهم دوافع الجواز… علشان كده لازم كل واحد فينا يكون حريص انه يسد الاحتياج ده عند شريك حياته…ويطلبه لما يحتاجه بلطف وبدون خجل.
وعلي فكره الونس حاجه بسيطه جداً.. بيتحقق بمجرد وجودك في محيط المتونس بيك☺️
إدراكنا للمعنى ده هايخلينا نفهم شوية حاجات زي :
- هاتفهم ليه مراتك بتفضل تحكيلك تفاصيل تافهة بعد ما ترجع من مشوار أو من الشغل …هي بتتكلم معاك لانها محتاجه تتونس بيك
- وهاتفهمي ليه جوزك ممكن يتضايق لما تخرجي وتسيبيه قاعد لوحده ويفضل يتصل بيكي زي الطفل الصغير عشان ترجعي رغم انك مجهزاله كل اللي هو محتاجه.… لانه ببساطه بيتضايق لما بيقعد في البيت من غيرك (ولو ان في رجالة بتستني اللحظة دي طبعاً 😂)
- وهاتفهم ليه مراتك عاوزاك تروح معاها المشوار اللي هي رايحاه رغم انها معاها عربيه وعارفه العنوان وبتعرف تروح لوحدها.... لانها عاوزة تتونس بيك في الطريق
-هاتفهمي ليه مكالمات جوزك الطويله بتحلي عندك في المطبخ جنب ودنك 😄.. هوه بيتونس بيكي .. حتي لو كل واحد فيكم مشغول
-هاتفهمي ليه أمهاتنا كانو بيطبقو الغسيل في الصاله في وسطنا… الونس ♥️
لما شريك حياتك / حد من عيلتك / صحابك .. يعمل حاجة او يقولك حاجة معناها (انا عاوز أتونس بيك) …لازم تهتم.
حتي لو اتوجد بس معاك.. بص له واضحك له بس او طبطب علي كتفه ووصل له احساس انك اد ايه حاسس بيه،
الونس او (الأنس) شعور جميل مش هانعرف قيمته غير لما تفتقده لا قدر الله
علشان كده بقول للأزواج دايماً ولادكم ضيوف هيمروا من البيت ياخدوا رزقهم ويونسوكم شويه وبعدين يستقلوا لحال سبيلهم .. وهتفضلوا انتو مع بعض زي ايام جوازكم الاولي (مضاف عليها نتاج عشرة السنين)
أنس وحب واحترام
الونس هو الشعور اللي بيكمل معانا بعد ما نكبر ونعجز وبعد ما صحتنا تروح واولادنا يتجوزوا.
💥الخلاصة :
محدش فينا يقدر مهما حاول انه يقاوم حاجته المستمرة للانس فى جميع مراحل عمره ودا طبيعى جدا لا هو ضعف ولا قصور
قال تعالى ::"وجعلناكم شعوبا وقبائل لتعارفوا "
وقال تعالى :" خلق لكم من أنفسكم ازواجا لتسكنوا إليها وجعل بينكم مودة ورحمة "
وهو دا حقيقة الاحتياج الونس،
