التبرج بين العقل والهوى
أسباب التبرج؟
١- الرغبة في إظهار الجمال للنفس.
٢- الرغبة في إظهار الجمال للرجال، لتشعر المرأة أنها مرغوبة.
٣- الرغبة في الزواج.
٤- الرغبة في فتنة الشباب لمجرد الفتنة.
كيف يُحلل كل سبب؟
١- طبيعتنا فعلًا إننا بنحب الجمال جدًّا، والدليل اننا سبحان الله تلاقونا كل شوية نبص لنفسنا في المراية، لو حباية طلعت نلاحظها من قصر المدة اللي بنبص فيها في المراية وشدة الملاحظة لتفاصيل النفس 😅
لكن فعلًا دا مش عيب، دي فطرة، وكوننا بنحب نظهر جُمال دي ممكن نستجيبلها بما يرضي الله ولا يسخطه سبحانه، وهو إننا نحط ما نشتهي .. في البيت، وطالما رغبتنا هي إسعاد نفسنا بس، فيكفينا فعلًا إسعادها في البيت بعيدًا عن أنظار الشباب، والنفس إن نفطمها تنفطم 🤍
٢- احنا بنحب نبقى مرغوبين، ودا شيء طبيعي، دايما الست حابة ان الرجال يرتضونها، ويرغبون في الزواج منها، لكن لو فكرنا، هنلاقي اننا هيتزوجنا رجل واحد فقط، فمكنتش مستاهلة نفتن ألفين شخص لأجل شخص واحد، واللي غالبًا مش هيكون شافنا قبل كدا، وهذه أغلب الزيجات؟ ليه نعرض نفسنا لسخط ربنا علشان حاجة مش مستاهلة نعملها، فنكون خسرنا دين، ومكسبناش دنيا؟
٣- طبيعة البنات انها لما تصل لسن الزواج تبدأ تفكر فيه، بل من قبل سن زواجها كمان، لكن لو فهمنا الأمر، الزواج رزق، والرزق من الله، فلو رضي الله أكرمَكِ، ولو سخط قد يمنع عنك الرزق، ورزقك مكتوب، فهتناليه هتناليه، واللي هتختاريه بس هو هل برضى الله ولا بسخطه، بل ولو اختارناه بسخطه قد يمنعه عننا عياذًا بالله،
وأعرف واحدة والله اللهم بارك انتقبت وغطت كل حاجة كل حاجة، ونحسبها تبتغي وجه الله، فاللهم بارك كمّية العرسان اللي جم لها كانت كبيرة جدا، لأنها قدمت رضا الله على هواها.
٤- فيه بنات للأسف بتتبرج لمجرد فتنة الشباب، هنا لازم تعلمي يا حبيبتي ان هذا لا يرضي الله تمامًا، وتخيلي لو انت كنت بتحاولي تلتزمي، وفيه شخص قدامك بيحاول يفتنك عن التزامك، وواقفلك في الراحة والجاية علشان يفتنك، مش هتضايقي وقد تدعي الله انه يخلصك منه؟ هكذا الشباب، بجد احنا مش مدركين قد ايه هم بيتأذوا من تبرج البنات، وقد ايه هم بيأذوكِ بنظراتهم 😞
ما الحل لكل واحدة؟
١- هنجاهد نفسنا، ونعودها أنها تشوف جمالها وتفرح بيه في البيت بس، هاتي اللي تحبيه، مكياج، لبس، بوديكير، مونيكير وغيره، مع مراعاة الحدود بينك وبين اللي موجودين في البيت، سواءً في اللبس، أو في الزينة 🤍
٢- هنحاول نُحكّم العقل على الهوى، ونفتكر التحليل اللي كتبناه في المشكلة من أن المرأة هيتزوجها رجل واحد فقط، وغالبًا هيبقى ميعرفهاش، فتتجه المرأة لمراعاة رضا الله، واجتناب سخطه، لأن الله أعلم هل هتنال ما ترجو من الدنيا ولا لأ، ودا يخليها تختار الأبقى على الأفنى 🤍
٣- فهم سُنة الله في أرضه، وفهم أن ما عند الله لا ينال إلا بطاعته، فنجاهد نفسنا علشان تلتزم بكدا 🤍
٤- هنا في محاولة فتنة الشباب لمجرد الفتنة لازم وحتمي تجاهدي نفسك، علشان متعرضين نفسك لسخط الله عز وجل 🤍
ما الحل إن لم نقتنع، لكننا نريد أن نسير كما يحب الله كي لا يعذبنا؟
الدعاء، ادعي كتير ربنا يرغّبك في الستر والعفاف، ويرزقك لباس العفة، ويحفظك من تحكيم الهوى على نفسك، الدعاء هو سلاح كل عاجز بجد، وربنا لو لقى منك صدق نية، مش هيخذلك أبدًا بإذن الله 🤍
🌋 نصيحة:
من انهارده يا حبيبتي اتخذي قرار العفة، ادعي ربنا يرزقك الرغبة، وابدئي غيري من لبسك، بناطيل واسعة بدل الضيقة، جيبات، دريسات، إدناءات، ملاحف، جلباب،..
لأن الجنة تستحق منك بذل الجهد علشانها، وبجد التبرج احنا مش مدركين بيأثر في الشباب ازاي، والتبرج دا عاقبته صعبة جدا، النبي صلى الله عليه وسلم قال إن المتبرجة لن تشم رائحة الجنة، وإنّ رائحتها لمِن مسيرة كذا وكذا!
فعلشان ربنا ميغضبش، وعلشان منضيعش الشباب، تعففي 🤍
