"نصائح من أخوك الكبير: لو عرفتها وانت صغير هتغير حياتك (الجزء الأول)"
نصائح من أخوك الكبير: لو عرفتها وانت صغير هتغير حياتك (الجزء الأول)
كل ما السنين بتعدي وتمر بتجارب، بتفهم الدنيا بشكل أعمق، وبتتمنى ترجع بالزمن وتقول لنفسك ملخص الخبرات دي وأنت صغير، كانت هتفرق معاك جدًا. بتسمع كتير: "ياريت أقدر أرجع بالزمن وأنا صغير وأصلح الغلطات اللي عملتها"، وللأسف ده مش ممكن. 😥
اعتبرني دلوقتي معايا آلة الزمن، واخوك اللي جاي من المستقبل اللي هيعمل معاك كدة! 😎💗
النصيحة 1: الفرامل بتاعتك لسه سايبة.. خد بالك ومتتسرعش!
يعني إيه؟ مش فاهم إيه اللي دخل العربيات في الموضوع؟ 🤔
تعالى أفهمك: في السن اللي انت فيه دلوقتي، الجزء اللي في المخ المسؤول عن كبح المشاعر وضبط السلوك لسه مكتملش، وده السبب اللي هتلاقي نفسك:
متسرع جدًا في إطلاق الأحكام 🤦♂️
بتغضب بسرعة 🤬
بتستفز بسرعة😡
بتفرح بسرعة 😆
بتزعل بسرعة 😥
بتحب بسرعة 😍
بتكره بسرعة 😠❤
دا أنت حتى بتاكل🍔 وبتشرب وبتنام😴 بسرعة! (هههه، لا بهزر.. الأكل والشرب والنوم ملهمش دعوة، + لو بتنام بسرعة يبقى دي معجزة! 😂)
المهم يعني: خلي بالك من الحاجات دي! معرفتك بالكلام ده هتخليك لما يحصل موقف تقول لنفسك: "اهدى بالراحة، اللي أنا بعمله دا مش طبيعي"، وتكون أحسن في التعامل مع المشاعر دي.
النصيحة 2: الصاحب ساحب! حاوط نفسك بالصحبة الصالحة
لازم تكون عارف إن البيئة والناس اللي حواليك بتفرق جدًا في سلوكك، ولو بتقرا كتب هتعرف إن كلامي صح. وفي أقوال مأثورة وأحاديث للنبي ﷺ زي:
"المرء على دين خليله".
"قل لي مَن تصاحب أقول لك مَن أنت".
"الصاحب ساحب".
وقَد إيه الصحبة والبيئة بتأثر عليك؟ يا إما ترفعك فوق السما، يا إما تنزل بيك سابع أرض!
لو مبتصليش وصاحبت ناس بتصلي → هتصلي زيهم.
لو مبتقراش وصاحبت ناس بتقرا → هتقرا زيهم.
واقولك على المفاجأة الكبيرة: لو مبتذاكرش وصاحبت ناس بتذاكر → هتذاكر زيهم.
وللأسف لو متشربش سجاير وصاحبت ناس بتشرب → هتشرب زيهم.
انت مش فاهم قد إيه التجمعات بتأثر عليك! دا أنت ممكن لما بتشرب لوحدك بتقول: "إيه القرف ده؟ إزاي في ناس بتدفع فلوس عشان حاجة مقرفة زي دي؟"، لكن لما بتشرب مع الشلة بقى، بتحسوا إن انتوا كبرتوا 💪، بقى قد إيه انتم كوول 😎.
والحقيقة مش كده خالص! الحقيقة إن انتم بني آدمين براس صرصار مش فاهمين حاجة. أنا أعرف ناس بدايتهم مع القرف ده إن صاحبهم قالهم: "خد جرب.. طب خد واحدة بس"، لغاية ما بقوا مش قادرين يبطلوا 🚭.
فـ حاوط نفسك بالناس الكويسة والناس الشاطرة عشان يرفعوك معاهم.
النصيحة 3: الفشل مش نهاية المطاف.. ومش نهاية العالم!
في المرحلة اللي انت فيها دلوقتي، بتكون معندكش صبر وعالطول مستعجل النجاح وعايز النتايج بسرعة. للأسف في الدنيا اللي احنا فيها مفيش الكلام ده، فتلاقي نفسك كل ما تفشل في حاجة:
تحبط.
تزعل.
تحس إن الدنيا جاية عليك.
وإن الدنيا اسودت في وشك.
وتعمل زي الست الفاضلة ام كلثوم : "طريقك مسدود.. مسدود.. مسدود!"
أنا عايز أقولك: يعني اهدى كده! انت لسه ماشفتش حاجة.. الحياة أصلاً كده كلها تخبيط ووقوع. لازم تقع عشان تعرف تمشي! مفيش حاجة بتنجح من أول مرة.. لازم تجتهد وتقع وتقوم عشان تنجح.
ولو زبطت معاك من أول مرة، اعرف إن في حاجتين:
يا إما في خازوق كده انت مش شايفه (عذرًا يعني.. أنا آسف على اللفظ بس عشان تفهم الفكرة).
يا إما انت قريب سوبرمان وجاي من عالم تاني غير بتاعنا!
لازم تفهم: الفشل ضروري! الفشل هو اللي بيعلمك.. يعني انت لما تنجح من أول مرة، انت فعليًا متعلمتش حاجة.. لكن لما تقع وتغلط، انت كده المفروض بتتعلم من الغلطات دي عشان تحسن من نفسك.
فـ طالما كده كده.. لازم أفشل! والمثالية شيء مستحيل. أنا ليه أزعل من حاجة بتحسّني؟ ليه أضايق من حاجة بتساعدني في تطوير نفسي وبتقربني من النجاح؟! وده مش كلام فارغ ولا كلام تنمية بشرية.. ده كلام ناجحين اعترفوا بده، زي بيل جيتس (مؤسس مايكروسوفت)
ومن هنا عايز أقولك: إن مفيش قرار غلط! كل قرار بتتعلم منه.. حتى لو مكنش القرار المناسب، فايدته إنه يعلمك ازاي تاخد القرار المناسب.
الفشل ليس نهاية المطاف: الفشل هو مجرد خطوة تعلمك ازاي تنجح.. الفشل مكون أساسي من النجاح. أنا مش بشجعك على الغلط ولا بقولك خليك إنسان فاشل.. أنا بفهمك إن عادي جدًا إنك تغلط وعادي جدًا إنك تفشل.. مش عيب! العيب بقى إنك متحاولش تصلح فشلك وتقلبه لنجاح.
ليه أصلاً الناس بتكره الفشل؟
بسبب إن المجتمع البشري للأسف مش متقبل ورافض فكرة الفشل، وشايف إن طالما انت غلطت يبقى انت محققتش نتائج يبقى انت فشلت! مش مهم بقى اتعلمت ولا لا.. المهم تحقق النتائج اللي احنا عاوزينها.
والسبب في ده هو معاملة المدارس لينا واحنا صغيرين: "طالما غلطت في المسألة دي يبقى انت مش ناجح ومش مذاكر كويس"، مع إن ممكن عادي المدرس أو المدير يغلط.. لأنه في الآخر إنسان.
وإي حد يقولك: "انت غلطان"، قوله: "عادي! إيه المشكلة؟ طالما أنا بتعلم منه".
وكده خلص الجزء الأول.. انتظرونا في الجزء 2! 🔥
