اعرف قيمة نفسك
الكثير منا لا يعرف قيمة نفسه حق المعرفة، لذلك لا يجد نفسه في المكانة التي يستحقها. وكما يقال: “مقامك حيث أقمت نفسك، وليس كما أقامك الناس.”
في جملة جميلة سمعتها في فيديو لبنت بتقول: "محدش هيحطك في مكانة أعلى من اللي حطيت نفسك فيها." ودي من أجمل وأصدق الجمل اللي سمعتها.
كونك شخص عارف قيمة نفسه، ده يخليك متبصش لحاجة أقل منك، ولا تعلق نفسك بناس مش شبهك. وكمان هتقدر تتخلص من العلاقات السامة بسهولة، وده لمجرد إنك عارف استحقاقك وقد إيه أنت تستحق تكون مع شخص أفضل.
واعرف إن مفيش حد يستحق إنه يستحقك مرتين.
واعرف كمان إن معرفة قيمة نفسك مش معناها إنك شايف نفسك أحسن من غيرك، لكن معناها إنك عارف حدودك وحقوقك، ومش هتسمح لأي حد يقلل منك أو يهينك. الشخص اللي مقدر نفسه بيختار المكان اللي يقدره، وبيبعد عن أي بيئة تقلل من مجهوده أو تشعره إنه أقل من غيره. وكمان بيفهم إن احترام الذات بيبدأ من الداخل، لأنك لو أنت مش مقدر نفسك، هيكون صعب تتوقع من الناس إنها تقدرها. اهتم بنفسك، وطور من مهاراتك، واشتغل على أخطائك، ومتستناش حد يديك قيمتك، لأن قيمتك موجودة بالفعل، وكل اللي عليك إنك تعرفها وتحافظ عليها. ومع الوقت هتلاحظ إن اختياراتك بقت أفضل، وعلاقاتك بقت أهدى، وثقتك بنفسك بقت نابعة منك، مش من رأي الناس فيك.
وكل ده طبعًا مش يديك الحق إنك تفرض نفسك، أو إنك لازم تبقى الشخص المرغوب للجميع. شعورك المبالغ فيه بالاستحقاقية هيضخم معاناتك، لا الحياة هتعاملك باستثناء، ولا الآخرين هيؤمنوا إنك جائزة.
وهناك أيضًا علامات بتثبت إنك لا تعرف قيمة نفسك:
1- بتقبل معاملة سيئة خوفًا من خسارة الناس.
2- بتسعى لإرضاء الجميع حتى على حساب نفسك.
3- بتقارن نفسك دايمًا بالآخرين.
4- بتستنى التقدير من الناس عشان تحس بقيمتك.
5- بتعتذر كتير حتى لو مش غلطان.
6- بتقلل من إنجازاتك وتشوفها عادية.
7- بتشك في قدراتك رغم نجاحك.
8- بتخاف تقول "لا" عشان محدش يزعل.
9- بتتعلق بأشخاص بيهملوك ومش بيقدروا مشاعرك.
10- بتقبل بأقل مما تستحق في العلاقات أو الشغل أو الدراسة.
11- بتجلد نفسك على أي غلطة بسيطة.
12- بتخاف تجرب حاجات جديدة خوفًا من الفشل أو كلام الناس.
13- بتسمح للناس اللي في حياتك تتعدى حدودها معاك.
14- بتربط قيمتك برأي الناس فيك أو بعدد اللي بيحبوك.
15- بتحاول دايمًا تلفت نظر أي حد عشان تتحب.
16- بتقدم حاجات كتير مش مطلوبة منك.
المغزى إنك تعزز نفسك، ولا تفرض نفسك. وتذكر دائمًا أن احترامك لنفسك هو البداية الحقيقية لأي نجاح أو علاقة صحية في حياتك.
وبس كده يا صديقي، استنى المقال الجاي عشان تعرف إزاي تبقى شخص مبادر…
استودعك الله. 🧡
