سلسلة مراحل تطور الكاتب " إلى كل كاتب مبتدئ"
ملحوظة هامة : هذا المقال موجه إلى كل كاتب مبتدئ يرغب في التطوير من مستواه الكتابي و المقال القادم سوف يكون عن الوصول إلى القراء و في حالة الاستفادة منه أما في هذا المقال سوف أحدثكم عن خطوات البدء بعالم الكتابة الإلكترونية .
أولًا : مرحبًا بكم داخل عالمي الصغير أنا الكاتبة شيماء الجندي و هذا المقال موجه إلى الكتاب الجدد في عالم الكتابة و تحديدًا كُتاب “الروايات” المبتدئين .
ثانيًا : في هذا المقال سوف أتحدث عن تجرية شخصية و وجب التنويه أنني لازلت أحاول التطوير من نفسي و اتخطى عثراتي الكتابية و الدليل هو إصراري على إعادة كتابة روايتي الأولى “قيدني عشقه” والتغيير الجذري بشهادة القراء المتابعيين ليّ وعلى سبيل المثال لا الحصر تحول عنوان الرواية من “قيدني عشقه” إلى “أغلال الروح” و إعادة سرد و أحداث الرواية و أيضًا إضافة و حذف شخصيات بعد أن بدأت استوعب ما هي مرحلة النضج الكتابي و تفاقم داخلي شعور مسؤولية ائتماني على عقلية القارئ و من هنا أبدأ معكم ببعض النصائح البسيطة وفي نهاية المقال سوف أترك لكم مفاجأة جيدة .
نصائحي تتلخص في عدة خطوات :- ملحوظة "هكتبها بالعامية عشان متحسوش إني فرحانة بالكلمتين الفصحى بتوعي !!!"
تنبيه هام جدًا الكتابة موهبة و ممكن تكتشفها صدفة أصلًا ودور المقال دا نقل خبرة بسيطة وغلطات أنا وقعت فيها ومش عايزاك تتعطل بيها في طريقك يعني عايزاك تبدأ صح !
الخطوة الأولى ← الفكرة الأساسية لروايتك بتبدأ توصف الرواية بتاعتك بجمل صغيرة يعني بتحط زي مقدمة مبدئية كدا و بمناسبة المقدمة هأكد عليكم رجاء شخصي بلاش تكتب قصة حياتك في المقدمة يعني المقدمة بتاعتك متبقاش كبيرة ولا فيها قصة حياة الرواية أصل انا هدخل اقرأ إيه بالعقل كدا ؟ و فيه غلطة تاني أنا وقعت فيها في أول عمل ليا كانت بالشكل دا"احبها فكذبت عليه و هو يكره الكذب بشده … إلخ" و بجد كل ماافتكرها اضحك على بدايتي لكني فخورة بطلوعي السلم خطوة خطوة و بدون مساعدات من حد الحمدلله ومش عيب تغلط وتتعلم وتضحك على سذاجتك في البداية نيجي دلوقت للمقدمة بعد التعديل “جميعنا هناك ! خلف بوابات الألم حيث تتوارى أجساد و تُنتهك قلوب و تُغتصب أرواح قيدتها أغلال ! أما عن أغلال روحي ؛ دعني أخبرك أنها صُنعت من نيران الألم ولهيبها لم ولن يخمد إلى الأبد !!" و لهيب الهوى قريب هتحصل قيدني لكن على أخف شوية فمتتكسفش من بداياتك ولا تزعل من الكلام السلبي و ركز على تعديل غلطاتك لحد ماتوصل لهدفك
الخطوة الثانية ← الشخصيات و تحديد أفكارك ورقة وقلم و دول مش هنقول أساسسين لكن الأفضل كأنك بترسم الفكرة كدا على ورق أنا عن نفسي برتب أفكاري في دماغي أو في نوت كدا عللى اللاب و دا بحكم إن اغلب شغلي عليه فلو مش بتحبه أو مش متوفر عادي مش أمة كونية كمل زي ماأنت على نوت الفون أول نوت ورقي و دا معايا في شنطتي على فكرة و بفضله عن الفون وأنا برا ، و بعدها أبدأ اعيش كدا مع الورقة والقلم وارسم زي دواير كدا فيها الشخصيات و الصلات بينهم و العلاقات وهكذا .
ملحوطة : لو عندك طريقة مميزة و بتستخدمها في رسم الشخصيات يبقا تاني خطوة دي مش ليك اخل على الثالثة بقا
الخطوة الثالثة ← دوافع الشخصيات وأهدافها إيه و دا طبعًا بيكون نابع من فكرة روايتك يعني البطلة مثلًا بتتصرف بالشكل دا بناءًا على إيه ؟ مش معقول ولا منطقي تكون مولودة بتتصرف كدا لوحدها . رجاء شخصي و دا أنا موقعتش فيه الحمدلله احترم عقلية القارئ لأنه هو نفسه لو شافك ساذج هيتقفل منك ومترجعش تقول انتقدني كدا ليه ناقشه لو شايف إن ليك وجهة نظر محددة أو لسه هتظهر فيما بعد وضحله دا و فهمه إنك بتتناقش و بلاش تاخد النقد إنه خناقة لأن حقه في التعبير عن رأيه مكفول زي ماحقك في الرد مكفول .
الخطوة الرابعة ← سمات كل شخصية وبتكلم هنا عن السمات الجسدية و العقلية أوصف بقا شخصيتك و عيش يعني الجسدية مثلًا لون بشرته ، لون العين ، الشعر و هكذا ، العقلية بقا دماغ شخصيتك ماشية إزاي ، تعاملاته و طريقته مع باقي الشخصيات و هكذا …
الخطوة الخامسة ← السرد و الأحداث عن حضرتك بالخطوات السابقة جهزت هيكلك الخارجي للرواية يعني رتبت فكرتك وشخصياتك و عملت مقدمتك و مسودتك ؟ ادخل بقا على الهيكل الداخلي و دا بالنسبة ليا عبارة عن السرد و الأحداث اكتب مشاهدك بقا على مهلك كدا و أنا عن نفسي بعمل دا مع فنجان قهوة .
دي بالنسبة ليا أهم خطوات المفروض تكون عندك كدا في سستمك و مع الوقت هتتعود عليها حابة أنوه عن نقطة مهمة جدًا جدًا وهي إن حضرتك لازم تشتغل على نفسك في الكتابة بالفصحى وتطور من نفسك واحدة واحدة أنا واحدة من الناس مش بعترف بالعامي و لا أميل لقراءة أي رواية عامية مهما كانت عظمة فكرتها العامي دا تستخدمه في شات صحابك بقاا مش في رواية ياعم
الهدية بقا إن أي كاتب موهوب و نحط تحت موهوب مليون خط و بدأ بالخطوات دي يبعتلي على صفحتي من هنا أو الواتساب و هنزله إعلان روايته على البيدج اللي بنزل عليها رواياتي وهنا لينكها و لو عنده واتباد هعلن ليه عليه كمان ودا لينك الواتباد هنا
اضغط هنا لو حابب تتابع حسابي على تويتر
المقال القادم بإذن الله عن طريقة الوصول إلى القراء في حالة توفر عمل جيد معك
