عشرة حيل عبقريه للتوفير في مصروف البيت المصري هتخلي المرتب يكفي معاكي لآخر الشهر بدون حرمان ولا حيره بأفكار سهله وبسيطه

 10 حيل عبقرية للتوفير في مصروف البيت المصري هتخلي المرتب يكفي لآخر الشهر*

كلنا بنشتكي ان المرتب بيخلص يوم 15 في الشهر، والمصاريف بتزيد والاسعار بتطير. بس الحقيقة ان التوفير مش معناه اننا نحرم نفسنا ولا ولادنا، التوفير معناه اننا ندير الفلوس بذكاء. انا جربت حيل كتير ومع الوقت اكتشفت ان شوية تغييرات صغيرة بتفرق جامد.

*1. الميزانية الاسبوعية هي السر:*
اكبر غلطة بنعملها اننا بنمسك المرتب كله مرة واحدة. قسميه اربع اظرف، كل ظرف لأسبوع. مثلا لو معاكي 4000 جنيه مصروف، خلي كل اسبوع 1000 جنيه. لما الفلوس تبقى قدامك متقسمة، هتحسي انك متحكمة فيها ومش هتتصدمي اخر الشهر. وحطي ظرف خامس صغير للطوارئ حتى لو 100 جنيه.

*2. ورقة الطلبات قبل ما تنزلي السوق:*
عمرك ما تنزلي السوبر ماركت وانتي جعانة او من غير ورقة. اكتبي كل اللي ناقص في البيت في ورقة والتزمي بيها. اي حاجة مش في الورقة متشتريهاش مهما كانت عليها عرض. العروض الوهمية هي اللي بتخلص الفلوس.

*3. سوق الجملة هينقذك:*
الحاجات الاساسية زي الرز والمكرونة والسكر والزيت والسمنة، هاتيها مرة واحدة في الشهر من تاجر جملة في جمصة او سوق المنصورة. الفرق بين سعر الجملة والقطاعي ممكن يوصل لـ 25%. يعني لو بتشتري طلبات بـ 1000 جنيه هتوفري 250 جنيه وانتي واقفة.

*4. بواقي الاكل كنز:*
الست الشاطرة مش بترمي اكل. الرز البايت اعمليه رز مقلي بالخضار او فتة. العيش الناشف حمصيه واعمليه بقسماط. الفراخ البايتة قطعيها واعمليها شاورما او حشوة للجلاش. كده انتي وفرتي تمن وجبة كاملة كل يومين.

*5. وداعا للدليفري الكتير:*
حسبيها معايا، لو بتطلبي دليفري مرتين في الاسبوع كل مرة 150 جنيه، يعني 1200 جنيه في الشهر رايحين في دليفري بس. خليها مرة واحدة في الشهر كمكافأة للولاد، واتعلمي وصفات سريعة في البيت زي البيتزا والكريب هتوفري وتفرحي ولادك اكتر.

*6. فاتورة الكهربا والغاز:*
اطفي اي نور مش بتستخدميه، وشيلي فيشة الشاحن بعد ما يخلص. شغلي الغسالة لما تتملي خالص، والتلاجة متفتحيهاش كتير. الحاجات الصغيرة دي بتنزل الفاتورة من 500 لـ 300 جنيه.

*7. حصالة الخمسة جنيه:*
هاتي برطمان فاضي وحطي فيه كل يوم 5 او 10 جنيه. متستقليش بالمبلغ. اخر الشهر هتفتحيه هتلاقي 150 لـ 300 جنيه. الفلوس دي خليها للزنقة او لهدية لولادك.

*8. دوري على البديل الارخص:*
مش لازم اغلى نوع مسحوق او شامبو، جربي الانواع المتوسطة كتير منها ممتاز. وبدل اللحمة كل يوم، نوعي يوم كشري، يوم عدس، يوم مسقعة، اكل مغذي واوفر بكتير وهترتاحي من التفكير.

*9. صلحي قبل ما ترمي:*
الهدوم اللي اتقطعت وديها للخياطة، الخلاط اللي باظ شوفي حد بيصلح، الكوتشي اقطعيه. ثقافة التصليح هتوفرلك الاف الجنيهات في السنة.

*10. الاتفاق مع جوزك:*
اقعدوا اول كل شهر خمس دقايق بس، احنا هنوفر في ايه الشهر ده؟ لما انتي وجوزك تبقوا فريق واحد، التوفير هيبقى اسهل بكتير ومش هتحسي انك شايلة الهم لوحدك.

جربي تطبقي 3 حاجات بس من دول الشهر ده وشوفي المرتب هيكفي ازاي. التوفير عادة بتتكون مع الوقت