التعليم لابداية ولانهايه

حابة ابدأ الكلام عن معاناتي كأم

 مع أطفالها

اصبحت بدايةالعام الدراسي بداية أيضا للشقاء المعنوي والمادي لنا ول اولادنا  صعبتوها علينا يعني ايه طفل عنده ٨ و٩ سنين يطلع من المدرسه علي درس ويطلع من الدرس علي درس تاني، ييجي البيت ينام وهو بياكل

يعني ايه تقييم يوميا يعني ايه امتحانات شهريا ماهو الكل يلغي الواحد كفايه امتحانات الشهر ارهقتمونا طيب اهتموا بالمدارس وفروا معلمين وفروا أدوات صعبتوها جدا علينا الله يصعبها عليكم

 انا من كتر ماالولاد بتصعب عليا انا كمان تعبت نفسيا جبتولنا الهم كفايه علينا هم العيشه الصعبه يعني دروس لطفلين عاوزة ٥٠٠٠ جنيه شهريا طيب نسيب الشغل علشان ناخد بالنا من الولاد والواجبات والمذاكرة والدروس مش هنلاقي نأكلهم

الأيام بتجري لابيلحق يذاكر ولايرتاح ولا يتعلم في ظل كمية المعلومات الرهيبه اللي حشيتوها ف الكتب يركز ف منهج الساينس ولا الدراسات ولا العربي ولا الانجليزي وغيره وغيره وكله كوم والماث ده بقي كوم تاني اللي حط المنهج ده واحد فاضي جدا او عبقري جدا او العكس بقي

 لما انا متعلمه وواخده كليه وعامله ماجستير ودورات كتير علشان اذاكر درس ماث ل ابني في سنه تالته ابتدائي بقعد اجيب فيديوهات واذاكر الدرس ساعتين علشان اقدر اشرحهوله يبقي ايه انت فاكر العيال دي احمد زويل ولا فاكر أن  بالمناهج دي طورت منظومة التعليم ده انتوا خربتوها ودمرتوا طفولة اولادنا ده ربنا رفع عنهم الحساب لحد مايكبروا 

انتوا حد موصيكم علينا احنا مش بنام ولا عارفين نرتاح ولانشوف شغلنا عاوزين فلوس ومجهود وصحه ووقت، طيب تقدروا تخلوا اليوم اكتر من ٢٤ ساعه ، تقدروا تزودوا المرتبات علشان نكفي ملخصات ودروس ومواصلات واكل وشرب للعيال ليه بتعملوا فينا كده،

ايه هتستفادوه من عذابنا منهج فاشل وطريقه فاشله مش عارفين تعملوا ايه في مثل بيقول الفاضي يعمل قاضي وانتوا عملتوا جلادين 

عاوزة حد يقولي ايه هيستفادوه ولادنا من المناهج دي كلها قولي هيطلع حصيلة معلوماته ايه من السنه الدراسيه المكدسه صفر علم وصفر راحه وصفر تعليم.

زرعتوا فيهم الخوف تخيل طفل ف تالته ابتدائي مش عارف ينام علشان عنده امتحان العيال بقي عندهم رهاب من المدارس.

والكل ينادي ويهاتي ويقول يابلادي ارحمي ولادي ولكن لاحياة لمن تنادي احنا في وادي وانتوا ف وادي، عاوزين نعرف سكوتكم ده لمصلحة مين.

فين أيام زمان احنا عايشين في نقمة الحداثه في تطور مغلوط في استغلال لكل لحظه حلوة في حياة الطفل في ضرب ولي الأمر عرض الحائط وكأنه قاعد علي كنز علي بابا ودماغه متقسمه حته مجدي يعقوب وحته احمد زويل وحته ياباني وحته امريكاني واحنا يادووب علينا العيشه ونكفي إلتزاماتها.

  يارب بحق تعبنا وتعب عيالنا ارنا فيهم عجائب قدرتك ، فوضنا أمرنا ليك يارب إنك بصيرا بالعباد

ولاحول ولاقوة إلا بالله