هعلمك ازاي تشتري عربية 128 في كام خطوة من غير ما تنخدع

موضوعنا انهردا عن ..ازاى تشترى عربيه 128 ..وعشان الهرى والفتى الى شغال فى موضوع الاسعار والعالم الى تقلك ديه عربيه128 متسواش والكلام بتاع العالم الكتيانه ديه

طبعا كلنا شوفنا مليون موضوع بيقلك نصايح لما تشترى عربيه مستعمله بس محدش عمره خصص موضوع منفصل لل128 عموما لو بتشترى او معاك اصلا 128 حتستفاد من الموضوع ده

**** خلينا نتفق ان فيه نوعين من العيوب نوع بينزل من ثمن العربيه ونوع تانى يخليك متشتريش العربيه من اساسه

من وجهه نظرى اى عيوب فى العفشه او الموتور او الصاج الخارجى او الصالون ممكن تتعالج كل الى حتعمله انك تنزل تمنها من فلوس العربيه وانت بتشترى

نيجى بأه للعيوب الشرعيه الى تخليك متشتريش العربيه لان علاجها صعب جدا ومكلف ومش اى حد بيعملها او يعرف يعملها مع ملاحظه ان مفيش حاجه مستحيله بس العيب ده بيفضل عيب

** حضرتك اول حاجه حتعملها حتشوف العربيه مغيره نص او ربع او سقف وديه عيوب شرعيه مش حتعرفها غير بالتجربه وخبرتك فى اماكن اللحام لان فيه ناس بتغير سقف بس وفيه ناس بتغير سقف بالقوايم ..مكان لحام النص او الربع بيكون معروف للسمكرى بس الى حضرتك لازم تكون واثق فيه جدا وغير كده يبأه بناقص منه

**ثانيا حضرتك بتجيب متر وتقيس من مسمار المساعد فى الحوض الى المسمار الثانى والمسافه حتكون 99سم غير كده يبأه الشاسيه فاتح او قافل وده له تبعياته بعد كده على الكبالن واجزاء كتير فى العربيه

** حضرتك حتبصلى على العلب تشوفلى فيها لحامات ولا نضيفه لان ده من اشهر عيوب ال128

** حضرتك حتشيل الكوتش بتاع حرف الحوض وتبصلى على المكان بين الفخده والرفرف تشوف فيه لحامات ولا لأ 

** حنتعب حضرتك شويه وتبص فى اركان الحوض ورا علبه التكيف وورا مكنه المساحات تشوفلى الضوافر موجوده ولا مش موجوده وهل شكلها متساوى ولا معمول فيها شغل

** حنتعب حضرتك شويه وتسحبلك دواسه او غطا العربيه وتنزل تحت العربيه تبصلنا على الدواسات الى هيه مكان رجلك وانت قاعد قدام اخبارها ايه متغيره ولا فيها برومه خلى بالك الدواسات الاصلى ورا وقدام بيكون فيها خرم كده على شكل مثلث عشان المياه لو دخلت العربيه تنزل منها

** ولو فيها رخامه حضرتك حتفتح الشنطه تبص عليها اهم حاجه فوق البطاحات مكان تركيب المساعد عشان العربيه لو مفيهاش كرتيرات المكان ده بيتبهدل جدا البرومه الى موجوده تحت فى اخر الشنطه مكان خروج المياه ديه متخفش منها علاجها سهل بس كله بتمنه

** معلش بردوا احنا تعبينك معانا بس كل ده لمصلحتك حتلفلى على ابواب العربيه تفتحهم وتقفلهم وتشوف

 

خلي بالك وانت بتشتري وومتهمتش بكلام االبائع

 

 معلمين فى قايم العربيه ولا لأ وكمان تبص على القوايم بالمره سليمه ولا معمول فيها شغل

** متنساش كده تخدلنا لفه على العتب بتاع العربيه وتضربلى ايدك تحته عشان تشوف اخبار البرومه 

**ولو فيها رخامه مننا حتحللنا كوتش الابواب حاجه بسيطه وتشوف اللحامات ديه بنط مصنع ولا احام عوكل الجن 

** لو انت لقيت الدنيا تمام وكله قشطه تضربلنا غطس فى الحوض تشوف الطبب بتاعت الحوض الاصليه موجوده فيه ولا لأ ويا سلام لو لقتها كده يبأه انت بتتفرج على عربيه سليمه جدا

*******************************************

خش يا معلم على الموتور

حضرتك حتدور العربيه وتقف جمبها زى البرنس تسمع فيه تخبيط وترزيع ولا الصوت ماشى تمام وناعم ومفيش ترشيح زيت من اى مكان ولا ايه محنا قلنا كل حاجه بتمنها 

** حضرتك تعمل ناصح وتشدلى باه خرطوم الفايز من عمه الكربراتير وتزود بنزين من الاكسراتير وتشوف الخرطوم بيطلع دخنه جامده ولا بسيطه ولا مفيش اصلا وريحه الدخنه هل هيه ريحه حريق زيت بسيط ولا ريحه زيت طالع عين امه وكفران

** حضرتك بالراحه كده تفكلى غطا الزيت من فوق ومتخلعوش كله عشان حيبهدلك زيت وتشوف هل اندفاع الزيت كويس وبيطرتش من الفتحه ولا المكنه تعبانه وعلى قدها

**حضرتك حتجرلنا ناحيه الشكمان وتسده وتشوف العربيه عرقت مياه على الفوطه الى فى ايدك ولا هباب والعربيه حتبطل ولا لأ وكمان حد يزودلك بنزين وشوف اندفاع الهوا ضغطه حلو ولا لأ وكمان لون العادم وريحته

******************************************

بص باه يا معلم العفشه عندك حتلفلى على كل مساعد وتعمل زى العيال الصغيره وتقعد تهز فى العربيه من نحيته وانت فرحان كده وراسم بسمه على وشك لان صاحب العربيه ابتدى يعرف انك خبير وبتفحص العربيه بجد المهم تشوفلى اى مساعد محجر او بيرزع او اى تخبيط او تزيق

*** وياسلام لو نزلتلى تانى تحت العربيه بصتلى على كواتشات الكبالن والمقصات عشان لو الكوتشات متقطعه من فتره فأكيد الكبالن متفشخه

حضرتك بعد متعمل كل ده حتخدلى كام خطوه لورا وتلفلى حولين العربيه تشوفلى حاله الدوكو والسمكره لان ده كله بفلوس ومكن الازاز بأه والتابلوه ولو فيها كاسيت او سماعات او اى اكسسوار وحاله الصالون 

المهم عندنا انك اتاكدت من حاله الشاسيه وبعدين الموتور وبعدين العافشه

***********هعهعهعهعهع بعد ده كله لو صاحب العربيه مموتكش بصلنا على ورق العربيه وارقام الشاسيه والموتور والرخصه وكده انت عملت الى عليك 

وربنا يباركلك فيها ولاحظ انك تشترى بما يرضى الله --ولا تبخثوا الناس اشيائهم--

***ملحوظه :: الموضوع كله من واقع تجربتى الشخصيه الى ممكن تكون صح او غلط ومحدش مجبر انه ياخد بكلامى