هل تعدد المهارات ميزة ولا مصدر للتشتت؟
هل تعدد المهارات ميزة ولا مصدر للتشتت؟
في وقت من الأوقات، كان ممكن تكون شاطر في حاجة واحدة وخلاص، وده يكون كفاية جدًا.
لكن دلوقتي الموضوع اختلف ممكن تلاقي شخص بيتكلم إنجليزي، وبيتعلم ألماني، وبيعرف يستخدم Excel، وبيعمل تصميمات بسيطة، وبيحاول يتعلم التسويق، وفي نفس الوقت نفسه يدخل في البرمجة وأول ما يشوف فرصة جديدة يقول:"دي كمان ممكن أتعلمها."
بس هنا بيظهر السؤال:
هل إنك تمتلك مهارات كتير يعتبر ميزة فعلًا؟ ولا ممكن يكون سبب في إنك تتشتت ومتوصلش لمستوى قوي في أي حاجة؟
الحقيقة إن تعدد المهارات ممكن يكون ميزة كبيرة جدًا، وممكن في نفس الوقت يتحول لمصدر للتشتت.
والفرق بينهم مش في عدد المهارات اللي عندك، لكن في طريقة إدارتك ليها.
هل لازم أكون شاطر في حاجة واحدة بس؟
طبعًا لأ تعلم أكتر من مهارة ممكن يفتح لك فرص كتير جدًا مثلًا، شخص عنده مهارة في الكتابة ومعاها أساسيات في التصميم والتسويق، ممكن تكون فرصه أكبر من شخص بيعرف يكتب فقط. وشخص بيتكلم لغة أجنبية وعنده مهارات في التواصل وخدمة العملاء، ممكن يلاقي فرص مختلفة عن شخص عنده اللغة فقط وده لأن سوق العمل نفسه بيتغير، وأصبح أصحاب العمل في أوقات كثيرة بيدوروا على شخص عنده مجموعة مهارات متكاملة، مش مجرد مهارة واحدة.
لكن فيه فرق مهم جدًا بين:
"أنا عندي أكتر من مهارة."
وبين:
"أنا بحاول أتعلم كل حاجة."
الأولى ممكن تكون ميزة والثانية ممكن تكون بداية التشتت.
المشكلة مش في تعدد المهارات
تخيل إنك قررت تتعلم 4 مهارات في نفس الوقت(لغة جديدة- تصميم- برمجة- تسويق)
في البداية هتكون متحمس جدًا هتفتح كورس هنا، وتشوف فيديو هناك، وتحمل تطبيق، وتكتب قائمة طويلة بالحاجات اللي عايز تتعلمها وأول أسبوع ممكن يكون تحفة لكن بعد فترة تبدأ تكتشف إنك مش قادر تتابع كل حاجة فتذاكر اللغة يومين وتسيبها وتبدأ كورس التصميم ومتكملوش وتتعلم شوية برمجة وتنتقل لحاجة تانية وبعد شهر تلاقي نفسك بتعرف شوية معلومات عن حاجات كتير، لكن مفيش حاجة منهم وصلت فيها لمستوى قوي وهنا المشكلة.
مش لأنك بتتعلم حاجات كتير، لكن لأنك بتحاول تدي كل حاجة نفس الأولوية في نفس الوقت.
طيب إمتى تعدد المهارات يكون ميزة؟
تعدد المهارات بيكون مفيد جدًا لما تكون المهارات دي بتكمل بعض يعني بدل ما تتعلم حاجات ملهاش علاقة ببعض، حاول تجمع مهارات تخدم هدف واحد مثلًا، لو مهتم بصناعة المحتوى، ممكن تتعلم: الكتابة - التصوير - المونتاج - أساسيات التسويق - إدارة منصات التواصل الاجتماعي.
هنا أنت مش بتشتت نفسك في خمس اتجاهات مختلفة أنت في الحقيقة بتبني مجموعة مهارات تخدم مجالًا واحدًا ونفس الفكرة لو كنت مهتم بمجال التعليم ممكن تطور مهاراتك في الشرح، والتواصل، وإعداد المحتوى، واستخدام التكنولوجيا، والتقييم كل مهارة منهم بتضيف للتانية وده اسمه ببساطة: مهارات متكاملة.
مش لازم تكون خبير في كل حاجة
دي نقطة مهمة جدًا.
لما نقول إن تعدد المهارات مفيد، مش معنى كده إنك لازم تكون محترف في كل مهارة بتتعلمها ممكن تكون عندك مهارة أساسية أنت قوي جدًا فيها، وحواليها مجموعة مهارات مساعدة بمستوى جيد.
مثلًا:
المهارة الأساسية: الكتابة.
المهارات المساعدة: التصميم، التسويق، البحث، إدارة المحتوى.
في الحالة دي، مش مطلوب منك تكون أفضل مصمم في العالم يكفي إنك تعرف تعمل تصميم مناسب لمحتواك، أو تفهم أساسيات التصميم بحيث تعرف تتعامل مع المصمم بشكل أفضل وده بيوفر عليك وقت، وبيخليك تفهم الصورة الكبيرة.
إمتى تعدد المهارات يتحول لتشتت؟
فيه شوية علامات لو بدأت تلاحظها، ممكن تكون محتاج تراجع طريقة تعلمك:
أول علامة إنك بتبدأ حاجات كتير ومبتكملش.
كل أسبوع عندك مهارة جديدة، وكل شهر عندك قائمة طويلة من الكورسات اللي بدأت فيها ومخلصتش منها.
علامة تانية إنك بتتنقل من مهارة لمهارة لمجرد إنك زهقت.
أول ما التعلم يبقى صعب، تقول: "يمكن المجال ده مش مناسب ليا"، وتروح تبدأ حاجة جديدة وبعد فترة يحصل نفس الشيء.
علامة تالتة إنك بتجمع معلومات أكتر ما بتطبق.
بتشوف فيديوهات كتير، وتحفظ مصادر، وتعمل Bookmark لعشرات الكورسات، لكن لما تيجي تستخدم اللي اتعلمته تكتشف إنك لسه مش عارف تبدأ وهنا لازم تسأل نفسك:
أنا فعلًا بتعلم؟ ولا بجمع حاجات عن التعلم؟ الفرق بينهم كبير.
طيب أتعلم مهارة واحدة ولا أكتر؟
مفيش إجابة واحدة تنفع لكل الناس لكن ممكن تستخدم قاعدة بسيطة: ركز على مهارة أساسية، وخلي حواليها مهارات مساعدة.
يعني اختار مهارة تكون هي الأولوية في الفترة الحالية وخصص لها معظم وقت التعلم والممارسة وبجانبها، لو عندك وقت، اتعلم مهارة تانية بسيطة تساعدك فيها ومش لازم تتعلم خمس مهارات في نفس الشهر ممكن تتعلم مهارة واحدة لمدة 3 شهور، وبعد ما توصل لمستوى كويس فيها، تبدأ تضيف مهارة جديدة بالطريقة دي، أنت بتبني نفسك خطوة خطوة بدل ما تحاول تعمل كل حاجة مرة واحدة.
اسأل نفسك: أنا بتعلم المهارة دي ليه؟
قبل ما تبدأ أي مهارة جديدة، اسأل نفسك سؤال بسيط جدًا:
"أنا محتاج أتعلمها ليه؟"
لو الإجابة: “علشان شكلها حلو.” أو “علشان كل الناس بتتعلمها.” أو “علشان خايف أفوّت حاجة.” يبقى استنى شوية.
لكن لو الإجابة: “هتساعدني في شغلي.” أو “محتاجة المهارة دي علشان أعمل مشروع.” أو “هتفتح لي فرصة جديدة.” فهنا عندك سبب واضح يخليك تكمل لأن الهدف بيحدد الأولوية.
مش كل مهارة مثيرة للاهتمام لازم تتعلمها دلوقتي ممكن تحطها في قائمة اسمها "بعد كده"، وترجع لها لما يكون عندك وقت أو لما تحتاجها فعلًا.
طب وفكرة فكرة "لازم أستغل وقتي"؟
السوشيال ميديا خلتنا نشوف ناس بتتعلم حاجات كتير جدًا في نفس الوقت واحد بيتعلم لغة، واحد بيقرأ كتاب كل يوم، واحد بيتعلم برمجة، واحد بيشتغل ويتمرن ويتعلم مهارة جديدة، وبسهولة ممكن تحس إنك متأخر لكن متنساش إنك بتشوف جزء صغير جدًا من حياة الناس مش لازم تعمل كل حاجة في نفس الوقت علشان تكون بتتطور أحيانًا إنك تختار حاجة واحدة وتركز فيها لمدة طويلة، ده في حد ذاته إنجاز كبير. التقدم مش سباق.
خلي عندك "مهارة أساسية" و"مهارات جانبية"
وفي طريقة بسيطة جدًا ممكن تساعدك في تنظيم الموضوع، اختار مهارة أساسية تكون هي أهم حاجة بالنسبة لك دلوقتي.
مثلاً: المهارة الأساسية: اللغة الإنجليزية وبجانبها مهارة جانبية: مهارات العرض والتقديم.
بعد فترة، لما تحس إنك حققت تقدم كويس، ممكن تغير المهارة الجانبية أو تضيف مهارة جديدة وبالطريقة دي، بتفضل بتتعلم وبتطور نفسك، لكن من غير ما تحس إن عندك 10 أهداف لازم تحققهم في نفس الوقت.
مش كل مهارة لازم تكملها
ودي نقطة ممكن تريحك جدًا أحيانًا تبدأ تتعلم حاجة وبعد فترة تكتشف إنها مش مناسبة ليك عادي جدًا توقف تجربة مهارة جديدة مش معناها إنك وقعت عقد لازم تكمل فيه للأبد لكن حاول تفرق بين: “المهارة مش مناسبة ليا.”وبين “المهارة صعبة وأنا فقدت الحماس.” لأن أي مهارة تقريبًا هتدخل فيها مرحلة تحس فيها إن الموضوع بقى أصعب وأبطأ وده طبيعي.
فقبل ما تسيبها، ادّي نفسك وقت كفاية للتجربة والممارسة.
في النهاية… الكثرة مش هي الهدف
الخلاصة هل تعدد المهارات ميزة ولا مصدر للتشتت؟
ممكن يكون الاتنين لو بتتعلم مهارات كتير بدون هدف، وبتبدأ حاجات أكتر ما بتكمل، فغالبًا تعدد المهارات هنا هيزود تشتتك لكن لو عندك مهارة أساسية، وبتضيف لها مهارات تانية تساعدك وتخدم أهدافك، فهنا تعدد المهارات ممكن يكون نقطة قوة حقيقية.
مش المهم إنك تقول: “أنا بعرف 10 حاجات.” الأهم إنك تسأل: "الحاجات اللي بعرفها دي بتساعدني في إيه؟"
اختار، ركز، طبق، وبعدها وسّع مهاراتك بالتدريج ومتخليش خوفك من إنك "تفوت حاجة" يخليك تبدأ كل حاجة أحيانًا أفضل قرار ممكن تاخده هو إنك تقول:"مش دلوقتي… دي ممكن أتعلمها بعدين."لأن النجاح مش إنك تعرف كل حاجة.
النجاح إنك تعرف إيه اللي يستاهل وقتك، وإمتى تركز عليه.
الرجاء تسجيل الدخول لتتمكن من التعليق