لما الكورة تغيب.. الخناقة تزيد
لما الكورة تغيب.. الخناقة تزيد
في زمن غريب تحولت ملامح الكورة.
زمان كنا بنستنى الماتش عشان نشوف مين لعب أحسن ومين خطته أذكى ومين يستحق يكسب
دلوقتي بقى ممكن الماتش نفسه يخلص من غير ما يحصل فيه حاجة تستاهل من ناحية الكورة لكن الاستوديو يفضل شغال بالساعات!
على احداث تانية زى حكم ظالم لعيب مشطب مدير فنى فاضى …
اللاعبين يقدموا 90 دقيقة مملة والاستوديوهات تعوض الجمهور عن الملل بخناقة محترمة وتصريح مستفز أو افيه حراق
ومقدم برامج داخل يقول كلام يخلي الناس تمسك في بعضها ويسخن فالضيوف
وهما بيقبضوا فلازم يمشوا عالرتم ويشغلوا السوشيال ميديا.
الموضوع ببساطة بقى:
لو الكرة مش قادرة تعمل ترند نخلي الخناقة تسد !
بدل ما نتكلم عن طريقة اللعب أخطاء المدرب والخطة و مستوى اللاعبين أو أسباب تراجع الكرة نلاقي الكلام كله رايح ناحية:
مين زعل من مين؟ ومين رد على مين؟ ومين قال تصريح أقوى من التاني؟
وبعض الاستوديوهات للأسف بقت تتعامل مع المشاهد على إنه داخل يتفرج على خناقة مش مباراة. ويعتروا هم صناع التعصب
كل ما الصوت يعلى والجدال يسخن والاسفاف يزيد المشاهدات تزيد معاها.
والأغرب إنك ممكن تلاقي مباراة فقيرة فنيًا جدًا لكن بعد نهايتها تكتشف إن عندك عشرات المقاطع المنتشرة من الاستوديو
وكلها عن مشادة فلان وعلان الجرجيرى والبهتيمى والزرزور والحرحور
وهنا لم يعد سؤال بل صار واقع : هل الإعلام الرياضي بقى بيحلل الكرة ولا بقى بيصنع محتوى للترند؟ بقى بصنع ترند
طبعًا مش كل الاستوديوهات كده ولسه فيه محللين محترمين بيحاولوا يفهموا الناس لكن كيد مش هيجذب الجمهور ف بيخسر قدام محتوى الصراخ والاستفزاز.
المشاهد نفسه له دور. طول ما الخناقة بتجيب مشاهدات وتفاعل هتفضل موجودة.
وطول ما الناس بتشارك مقطع لمحلل بيتخانق أو لاعب كان مغمور بس بيشتم الفريق الكبير
أكتر ما بتشارك لقطة فنية حلوة او هدف جميل الرسالة وصلت للقنوات:
هاتوا الخناقة.. وسيبوا التحليل بعدين!
لان اصلا مفيش حاجة تستاهل التحليل
والنتيجة إننا بقينا نستهلك كلامًا أكثر مما نستهلك كرة. ساعات النقاش يدوم يومين في تصريح اتقال في الاستوديو
ومش فاكرين أصلًا مين لعب كويس في المباراة!
الكورة في الأساس لعبة ومتعتها في الملعب. أما الاستوديو فوظيفته يساعدنا نفهم اللي شفناه بس
مش يحول المباراة إلى موسم جديد من الخلافات. والازمات والتعصب
لأن بصراحة، لو مستوى الكرة نازل، مش محتاجين نرفع مستوى الخناقات عشان نقنع نفسنا إن عندنا دوري قوي.
الفكرة هى لو مستوى الفرق فنيا عالى وفيه لعب زى العالم لن تجد القهاوى وقت للتفاهه
ويكون التحليل ساعتها مفيد والمفروض ينعكس على المنتخبات
وبما ان المستوى رديئ ومتشات مشروبة قبل كده ومكررة ومدارة وفيها مواءمات … حتى الاحداث مكررة
يعنى اخصب مكان أو بيئة تنمو فيها مثل المصاطب صانعة التعصب والتفاهه ….
الكرة لعبة والاستوديو لتحليل اللعبة طب لو فيه لعبة هنحللها ولو مفيش لعبة هنقعد عالقهوة ندقلها …..
