الصحه النفسيه للجيل الجديد
الصحه النفسية للجيل الجديد :ضغط مش باين بس تقيل
زمان كان الضغط له سبب واضح .امتحان ، شغل ،مشكله ف البيت .
انهارده الجيل الجديد 2000ل2010 شايل ضغط من نوع تاني .
ضغط صامت ،24 ساعه ، و محدش بيتكلم عنه .شايفين بس انو الجيل ده متوفر له الي كان صعب زمان .
العالم اتغير ..و المخ لسه بيتأقلم.
أكبر فرق هو الموبايل .صحينا لقينا الدنيا كلها مفتوحه قدامنا .
بتصحى تفتح فيسبوك و انستجرام تلاقي صاحبك مسافر ، و زميلك عامل بيزنس ،وبنت خالتك اتجوزت و خلفت . و انت لسه بتشرب قهوتك.
المقارنه بقت إجباري .زمان كنت بتقارن نفسك ب10 أشخاص في المدرسه .دلوقتي بتقارن نفسك بمليون شخص من كل دول العالم .
طبيعي تحس إنك متأخر حتى لو انت ماشي كويس .
زود علي ده إن المستقبل بقى ضبابي . زمان كان فيه طريق واحد : ذاكر ،ادخل كليه ،اشتغل.
دلوقتي فيه 100 طريق ، شغل حر ،تجاره إلكترونيه، كرييتور، AI .
الفرص كتير بس تختار ايه ؟ الخوف من الاختيار الغلط لوحده عامل ضغط.
إمتى تعرف إنك مش زهقان بس ؟
مش لازم توصل لمرحلة الاكتئاب عشان تقول انك محتاج تهدى .فيه علامات بسيطه بنتجاهلها :
1-التعب الي مش بيروح : بتنام كويس و تصحى مهدود . عشان مخك شغال طول الليل تفكير .
2- التسويف : مش كسل . هو إن المهمه تقيله على مخك فبتأجلها و تقعد على الموبايل تهرب .
3- فقدان المتعة : الحاجه الي منت بتحبها بقت ممله . لا عايز تخرج ولا تتكلم .
4-العصبيه من الهوا :أقل كلمه بتستفزك عشان انت اصلا شايل كتير.
لو لقيت نفسك في 2من دول بقالك فتره ،يبقى ادي لنفسك وقفة .
3 خطوات عملية تطلعك من الدايره دي و تقدر تعملها من النهارده :
- افصل ساعة في اليوم : سميها ساعه بلا شاشة .وقت الغدا ، قبل النوم، اقفل النت و الموبايل بعيد . امشي ، اقرا ، اتكلم مع حد في البيت . مخك محتاج يرتاح من المقارنات و الترندات . جربها 7 أيام و هتحس بفرق في نومك و مودك .
- اتكلم مع بني آدم حقيقي : الكتابة في النوتس و البوستات مش كفايه . الفضفضه بتفرق . اختار صاحب واحد ، أخ ، أخت ، أو حتى أخصائي نفسي لو الموضوع كبير . لما تقول الي جواك بصوت عالي الحمل بيخف النص .احنا مش لازم نشيل كل حاجه لوحدنا .
- كسب نفسك بإنجاز صغير : الضغط بيجي من إننا شايفين الهدف بعيد أوي . عايز أنجح ،عايز ابقى غني . كسرها .خلي هدفك النهارده إنك هتخلص درس واحد .تتمشى 15 دقيقه ، تطبخ أكلة ،الانجازات الصغيره دي بترجعلك احساس انك متحكم في حياتك و ده أهم علاج للتوتر .
الخلاصة .
الصحة النفسية مش دلع و لا هى حاجه احنا مبسوطين و احنا بنحاول نعالجها خايف تقول انك تعبان نفسيا خايف تقول انك اتغيرت مع ان الكل شايف التغيير دا خايف تخرج من البيت ،
الصحه النفسيه هى الأساس،زي ما بتودي العربية تتشيك عليها ، لازم تشيك على نفسك .
من حقنا نتعب و من حقنا نطلب المساعده .الضغط الي انت حاسه حقيقي و مش لوحدك الي حاسه . العالم بقى سريع زيادة عن اللزوم .
إنت أهم من أي شغل و أي ترند . 
