10 نصائح ذكية لكل بنت عايزة تعرفي ازاى تكون : واثقة و أنيقة ومميزة من غير ما تقلد اى حد .

انا عارفة ان كل بنت فينا بتحاول دائما وأبدا تكون احسن نسخة من نفسها ، بس ساعات عشان احنا بنكون شايفين بنات معينة ناجحة فى حياتها فبنعمل زيهم بالظبط لحد مابنكون نسخة منهم بالظبط وإحنا ناسين تماما ان التميز وانك تكونى نفسك هو دا سر النجاح   . فى المقال دا مش هغير لكن هديلك شوية نصايح وأرجوك كون مميزة وبتعملي زى معظم البنات اللى بتاخد الكلام وتنام عليه ولا من شاف ولا من درى .يلا بينا نبدأ . 

 1_ اهتم بنفسك عشان نفسك مش عشان حد 

اهتمامك بلبسك ومظهرك دا شئ مهم جدا وبيبنى شخصيتك كمان (مش قصدى ان دا الأهم لكنه مهم ومنقدرش نتجاهل أهميته) .

اهتمى بصحتك ، اعملى رياضة ، اعملى تحاليل وشوفى لو فيه فيتامينات معينة ناقصة عندك وابتدى اشتغلى عليها  ، اهتمى بنظام الغذائي وخدى بالك يكون متزن لأن الصحة اهم حاجة وهى اللى بيها بتقومى من سريرك كل يوم .   

اعملى لنفسك روتين عناية بالبشرة والجسم واهتمي بنضافتك الشخصية وريحتك .

2_ اهتمى بعقلك اكتر 

خلى فى بالك ان البنت الذكيةواللى دماغها متكلفة بتلفت الانتباه اكتر من البنت اللى مهتمة بشكلها بس  .

اقرأى كتب ، اقرأى مقالات ، اسمعى بودكاست وافتكرى دايما الجملة دى you have to know something about everything and everything about somethingيعنى لازم تعرف كل شئ عن شئ وشئ عن كل شئ .

3_ متقارنيش نفسك بحد ابدا 

خلينا نكون متفقين على حاجة كل واحد فينا ليه مميزات وليه عيوب فمتقارنيش نفسك بشخص تانى لأنه موريكى الجزء الحلو اللى فيه وبس . ولو فيوم حسيتى انك بتغيرى من شخص خدى الغيرة دى فصالحك وابدأى اشتغلى عالحاجة اللى انتى شايفاها فيه حلوة وتبنيها فشخصيتك لأنك طالما غيرتى انه عندو الحاجة دى وانتى لايبقى الحاجة دى بتلمس شخصيتك ومهمة فرحلتك  .

 

4_اهتمى بنضافة المكان اللى انتى فيه 

مش قادرة اقولك قد اى دا مهم ان بيتك ومطبخ واوضتك والمكان اللى انتى بتشتغلى فيه مهم يكون نضاف لأن دا بيزيد من الإنتاجية جدا حتى لو هتخصصى كل يوم ساعتين للنظافة مهم جدااااااا . 

5_اختارى صحابك 

خلى دايما الناس اللى بتدعمك داخل دايرتك المقربة واللى بيحبطوكى لو تقدرى طلعيهم من حياتك لو مش هتقدرى ابعدى نفسك أو اسحبي  نفسك وقللى التعامل معهم خالص 

6_خدى بريك من السوشيال ميديا والموبايل 

السوشيال ميديا والshorts بتسحبنا جواها سحب حتى لو  المحتوى مفيد ابعدي عنها فترات من اليوم مش يبقى كل اليوم  تليفون .

7_خصصى وقت لنفسك 

ساعات بندخل اوضتنا ونقفل على نفسنا الباب ونقول عايزين نقعد لوحدنا لكن بنكون واخدين معانا الموبايل او اللاب او ايا يكن ، حابة اقول القعدة لوحدك يعنى تقعد لوحدك من غير اى حاجة ممكن تعمل تأمل او تكتب يومياتك مثلا او اى حاجة ممكن تقعدى تخططى لحياتك بس المهم يكون فيه وقت تقعدي فيه مع نفسك لو على الاقل مرة فالاسبوع ياستى بس اقعدى مع نفسك  .

8_طورى مهاراتك

عايزة اقولك ان العالم كل يوم بتطور فطورى من نفسك ومهاراتك ومش معنى انك اتعلمت مهارة معينة انك خلاص بقيتي محترفة فيها لا حتى كل مهارة بيحصل فيها تطور كل يوم.

9_اتعلمى تقولى لأ 

قولى لأ لأى حاجة بتضايقك وتقلل منك وتحبطك واى انسان ميحترمكيش وفى فديوهات كتير بتعلمك حاجة زى كدا فاتعلمى .

10_حبى نفسك زى ما انتى كدا 

كونى فاهمة ان فى فرق بين انك تحبى نفسك وتكونى بتحافظى على نفسك وكرامتك وبين انك تكونى مغرورة فإحذرى وانا هتكلم عن موضوع حب الذات دا قريب جدا 

وبكدا حبيبتى اكون خلصت رحلتى معاكى النهاردة اتمنى تكونى استفدتى