عُمرك سألت نفسك عن السر ورا خُدعة بلع السيف اللّي بتشوفها في العروض السحرية أو الموالد ..؟
.
عايز أقولك إنّ مفيش (سحر) ورا الموضوع ولا حاجة واللعبة كلها في معلومة بسيطة مبني عليها تدريبات كتير عشان تتن بإتقان وبالمنظر اللّي بتشوفه دا، طب إيه هي المعلومة البسيطة ..؟
.
إن طول القناة اللّي بيتواصل بيها المريء مع المعدة واللّي بتبدأ بما بيُطلق عليه الـ Cardiac Orifice ودي بداية الفتحة من طرف المريء العلوي للمعدة تحت، وبتبدأ من أول الفك فوق من عند أسنانك القواطع كدة وحتّى نُقطة التقاء المريء نفسه بالمعدة جوّا خالص هو حوالي ٤٠ سم ..
.
ومن هنا بتبدأ المهارة بقى، فـ (بالع السيف) بيبدأ يتمرّن إنّه يقاوم (رد فِعل القيء) أو الـ Gag Reflex اللّي  الإنسان الطبيعي بيحس بيه لمّا حاجة بتدخل جوفه، زيّ صباعه مثلًا أو اللسان الخشب بتاع الطبيب رخلافه، ودا بالإضافة لإنّه بيبدأ يتمرّن إنّه يعمل hyperextension لرقبته، يعني يمدّها لورا بشكل قد يبدو عنيف للبعض بس دا عشان يرفع فمه لفوق أوي فبالتالي طرف القناة اللّي قُلنا عليها دي واللّي بتبدأ من الأسنان بدل ما هي متنية مع تنية الرقبة في وضعها الطبيعي، لا هتبقى في خط واحد مُستقيم مع باقي القناة نفسها فبالتالي السيف المُستقيم هينزل مفرود فيها أكنّه بيحطّه في جراب بالظبط ..
.
وطبعًا لقب (بالع السيف) مش دقيق أوي عشان فعليًا مش بيبلعه، بل هو بيمده داخل مريئُه فقط ويسحبه تاني، بس دا اللقب المُتعارف عليه بس، وطبعًا بمعرفة المعلومة اللّي فوق دي فمفيش سيف بيُستخدم فالخُدعة دي بيعدّي طوله ٤٠ سم عشان أطول من كدة هيثقُب المعدة بغض النظر عن كونه أصلًا بيبقى سيف (تِلِم) مش حاد عشان وهو داخل وخارج ميجرحش الأعضاء الداخلية دي ..
.
بس هل دا بينفي الخطورة ..؟ لا طبعًا عادي جدًا إنّ بردو السيف وهو داخل يثقُب حاجة في طريقه أو اللاعب يُسيء تقدير الطريق أو حتّى ميكونش فارد رقبته صح أو وضعها يوجعه فتتحرّك منّه لقدّام فالسيف يتحرك جوّا فيبهدل الدنيا، عشان كدة الموضوع بيبقى محتاج تدريب شاق ولازم يبقى اللاعب دا مُدرج في الـ International Sword Swallowers Association أو  (الاتحاد الدولي لبالعي السيوف) عشان يبقى حد مُعارف بيه في الأوساط المعنية دي خصوصًا إن من بداية التوثيق في ٢٩ حالة وفاة من جروح داخلية بسبب اللعبة من إجمالي الخُدع اللّي اتعملت ..
.
كل حاجة وراها معلومة عِلمية ما لو عرفتها هتحس إنّ الرؤية أوضح بعدها، فعرّف صحابك اللّي بيحبّوا الحاجات دي خلّيهم يشاركوك اللحظة ..
.
Ahmed Mahmoud