اهم نصائح لكل ام مع طفلها
طفلك في سنة اولى حياة ، محتاج حنانك و معتمد عليكي ف كل انشطة حياته واللي منها انه ياكل لحد مايشبع وإلا مش هيسيبك ف حالك و هيفتح فالعياط لحد مايسببلك صداع وبرضه مش هيسكت غير لما يشبع. يبقى لازم توفريله اللبن الكافي للرضعه اللي محتاجها ولازم تنظمي وقت الرضاعه وتعملي فرق توقيت بين الرضاعه يكون بين الساعتين و ال ٣ ساعات علشان يشبع و علشان الصداع اللي جالك ده يرتاح ..
وبيكون فرق التوقيت ده مفيد ليكي ولطفلك.
بالنسبة للأم فده بيديها وقت انها تلحق تجمع اللبن للطفل , طبعا ده في حالة الرضاعة الطبيعيه.
رضاعة الطفل بصوره طبيعية من الام بتحثّ الخلايا المسئوله عن تكوين اللبن ف صدر الام انها تشتغل وتكوّن اللبن فبالتالي لازم الخلايا دي تاخد وقت كافي بين كل رضعه والتاني لتجميع اللبن الكافي لإشباع الطفل .
معظم الامهات بتشتكي من قلة تكوين اللبن وده بيظهر في صورة لبن خفيف الكثافه و قليل الكمية وكمان بيظهر على الطفل في صورة البكاء المستمر و ملاحظة اكتسابه للوزن بصوره بطيئه ، وفي الحالة دي بننصح الام بالاهتمام بغذاءها و الحرص على تناول الخضروات والفواكه وشرب المياه والعصائر ، وممكن الام تستخدم مدرّات اللبن تحت اشراف الطبيب ، وطبعا فالحالات الشديده ممكن نستخدم بدايل الالبان الصناعيه عشان تعوض الطفل بالتغذية المطلوبة .
الالبان الصناعية بتكون بديل للبن الام الطبيعي في حالة نقص تكون اللبن الطبيعي عند الام وبيكون فيها مكونات غذائية صناعية شبيهة لدرجه كبيره بلبن الام الطبيعي وبالتالي بتدي لطفلك التغذية المطلوبة حسب عمر الطفل ، و في المجمل بتكون عبارة عن ٣ مراحل :
المرحلة الاولى أو اللبن رقم ١ ، وده بنستخدمه في اول ٦ شهور من عمر الطفل.
المرحلة التانية أو اللبن رقم ٢ ، بنستخدمه من بعد ٦ شهور من عمر الطفل و لحد عمر السنة.
المرحلة الثالثة أو اللبن رقم ٣ ، بنستخدمه من عمر السنة لحد عمر السنة ونصف.
استخدام الاعشاب الساخنة - زي مثلا استخدام الينسون الطبي - لعمل رضعات بديلة عن اللبن بيكون فعّال مع حالات الاطفال حديثي الولاده اللي بيعانو من المغص الناتج عن اضطرابات الجهاز الهضمي ، بس طبعا مابكونش اعتمادنا الاساسي على الاعشاب دي كبديل للرضاعه ولكن استخدامه بمعدل من رضعه واحده لرضعتين فاليوم .
اما بالنسبه لفوايد فرق التوقيت وتنظيم الرضاعة للطفل ، فده بيديه الوقت الكافي للهضم و بيحميه من اللانتفاخات وتفويض اللبن بعد او اثناء الرضاعه وبالتالي يحمي الطفل من المغص ، وكمان بيكون الطفل ابتدى يحس بالجوع على معاد الرضعه الجاية .
طبعا الانتفاخات والتفويض من صور اضطرابات الجهاز الهضمي اللي ممكن تتسبب في المغص عند الاطفال وكمان اعراض زي اخراج الريح بصورة متكرره او حدوث امساك متكرر مع الطفل من اشكال اضطرابات الجهاز الهضمي اللي بتكون مصاحبة للمغص عند الاطفال .
تنظيم مواعيد للرضاعه من اول خطوط حماية طفلك من اعراض اضطرابات الجهاز الهضمي المختلفة .
اضطرابات الجهاز الهضمي عند الاطفال حديثي الولاده من الحاجات الشائعة اللي معظم الامهات بتشتكي من اعراضها و زي ما وضحنا ان تنظيم مواعيد الرضاعة من اهم عوامل حماية الطفل من اعراض الاضطرابات دي ، كمان فيه ادوية ممكن نستخدمها عشان تقلل من حدة الاضطرابات دي وتخفف من اعراضها زي ادوية المغص و مادة ال trimeburine اللي بنستخدمها في علاج اضطرابات الجهاز الهضمي و مادة ال simethicone اللي بنستخدمها ف علاج الانتفاخات وتقليل التفويض ومادة ال glycerin اللي بنستخدها في علاج الامساك ، وطبعا كل الادوية والمواد دي لازم تكون تحت اشراف الطبيب.
اطفالنا نور في حياتنا ، واجبنا ناحيتهم نحميهم ، نرعاهم ونحبهم .
