لماذا كريستيانو الافضل

لماذا كريستيانو رونالدو | الأفضل!

ده ممكن يكون أهم بوست أكتبه، لأني هقول ليه كريستيانو  رونالدو بعد العمر ده كله وبعد وصوله لعمر ال 38" الأفضل بلا منازع وهيكون بعيدا عن حبي ليه!

الموضوع ببساطة هيكون عباراة عن شوية أسباب متأكد انها هتكون أسباب منطقية ومحسوسه واقعيًا، مفهاش صعوبة في الفهم او مصطلحات معقدة، زي..

إمكانيات اللاعب - مسيرة و نجاحات اللاعب.

قبل الدخول في الموضوع، هي دي الأسباب اللي هبني رأيي واستنتجاتي وقناعتي عليها.

- الإمكانيات:

زي ما احنا عارفين فا امكانيات لاعب كرة القدم معروفة، هي بتكون عباراة عن شوية حاجات،

السرعة، المهاراة، قوة بدنية، تسديدات قوية، تنوع في اللعب وتعدد طرق التوظيف والتهديف، زي التسجيل بالرأس او بكلا القدمين، او من وضعيات صعبة وفي وضعية جسدية غير مناسبة،

عن تنوع فني وتكتيكي وتعدد المراكز والمهام وإيجاد اللعب تحت أي فكر تكتيكي، إجادة صناعة الفرص وصناعة الأهداف، الشخصية القوية والحسم،

كل ده اللي ممكن يتوفر في لاعب كرة القدم مش كده؟

يكاد يكون في لاعب بيملك صفة من الصفات دي، ممكن صفتين او تلاتة أربعه، لكن بشكل قطعي مفيش لاعب ممكن يمتلك كل الصفات دي في جسد وعقل واحد، قطعًا لأ!

با أستثناء شخص واحد أسمه كريستيانو رونالدو، عشان متقولش إن مفيش إثبات لكده وبقول إي حاجه شوف معايا،

إمكانيات كريستيانو:

المهاراه والموهبة : تحديد ان اللاعب ده عنده المهاراة صعب شوية لأن الحكم بيكون مرئي أكتر ما هو رقمي، بس انا هقول دلائل بتأكد انه من أفضل اللاعيبه المهاريه تاريخيًا وانه موهوب مش زي ما الناس معتقده،

قدومه لمانشستر في البداية مكنش سببه عشان التسجيل، هو عشان كان مهاري وعنده الموهبه، وماتسغربش، رونالدو خطف انظار فرق كتير في اوروبا بسبب امتلاكة للموهبة،

فرق زي ارسنال وباليرمو وريال مدريد كانوا بيتنافسوا مع  مانشستر يونايتد لضمه للفريق بس اللي دفع كتير هو اللي جابه، وطبعًا مش عشان انه بيسجل اهداف!

فيرجسون شخصيًا أصر أصرار غير طبيعي علي التعاقد معاه في 2003، ولما حب يصنفه قال انه افضل موهبه دربها، مش أفضل هداف مثلاً، ده دليل بسيط علي انه كان موهوب،

عدد المراوغات في كاريره وصل تقريباً لما يقارب 1750 مراوغة! بمعدل 3 مراوغات وأكثر في المباراة الواحده، يعني في ال18 موسم اللي لعبهم معدل مراوغاتة في السنين لو اتوزعت علي كل ماتش هيكون بيعمل اقل حاجه 3 مراوغات

وده رقم كبير مش قليل، و في بطولة زي دوري أبطال اوروبا علي سبيل المثال، فاهو اتمم 433 مراوغه صحيحة، بمعدل ثلاث مراوغات في كل 90 دقيقة!

معدل مراوغاتة في أول ثلاث مواسم مع من 2004- 2007 مع مانشستر وصل لمعدل كبير، 5 مراوغات في المباراة الواحده متخيل! في المجمل فامعدل فترتة مع مانشستر وصل ل 3.5 مراوغة في كل مباراة اصلا،

تيجي حتي في فترته مع ريال مدريد من 2010 ل 2014 وصل معدل مراوغاتة في المباراه الواحده 4.5 مراوغة!

من 2015 ل 2021 الفترة اللي كان فيها إنخفاض ملحوظ في معدل المراوغات إلا ان معدله كان 3 مراوغات لكل 90 دقيقة، يعني ظل محتفظ بعدد المراوغات،

طب تعرف انه في أحد الماتشات أتم 21 مراوغة صحيحة في 90 دقيقه فقط وده رفم قياسي، ومعدلات تانيه من بين 15 ل 10 مراوغات في بعض المباريات،

فا تصنيف كريستيانو مهاريًا مش محتاج لتوضيحات أكتر من كده،  بنتكلم في انه أكتر 12 سنه من اصل 18 سنة، فا كريستيانو كان مهاري بشكل كبير ومخيف ولافت ومعدلات المراوغات والجودة في معظم فترات مسيرتة كان عالي جدا قبل ما ينخفض في السنين الأخيرة!

السرعة : من مميزات اللاعب وأهم صفاته هي السرعة، خصوصًا لما تكون السرعة سبب في انك تقدر تراوغ لاعب مش مجرد انك بتجري وخلاص، السرعة بتساعدك علي أنهاء الهجمات المرتدة والاراتدات من الدفاع للهجوم، كريستيانو قدر يجمع ما بين مكس السرعة والمهاراة ده بشكل مخيف،

علي أرض الواقع فا رونالدو سرعتة بتبلغ 39 كم في الساعة، وده رقم كبير للاعب كورة قدم، رقم يخليه يتقارن بعداء ويتفوق عليه كمان خصوصاً ان الأرضية العشبيه غير الصلبة،

وده بالظبط اللي عمله كريستيانو لما قدر يتفوق علي عداء إسباني في "اختبار قدرات كريستيانو" اللي تم في 2011!

رونالدو عمل اقصي معدل سرعة في تاريخ كورة القدم، امام اسبانيا بسرعة بلغت 38.6 , كيلو متر في الساعة، وبكده تم تصنيفه كأسرع لاعب كورة قدم في التاريخ،

رونالدو في فترة تواجده معا مانشستر كان بيتم تصنيفه علي أنه الاسرع من بين كل الموجودين و مع ريال مدريد كان اسرع لاعب في الفريق والدوري، حتي بعد وصوله لسن 34، رونالدو في احدي الإنطلاقات قدر يجري 40 متر في 11 ثانيه بس!! وغيرها من الإنطلاقات.

القدرة علي التسجيل: 
كتير ممكن يشوف ان أي لاعب قادر يسجل أهداف عادي وانها شئ سهل وقد يكون في بعض الاوقات عباراة عن صدف، بس الكلام ده مش عند رونالدو،

كريستيانو بيسجل نتيجة دراسة شاملة للكرة والتحركات، وبيبقا عنده توقع مسبق ل مكان الكرة وبيقدر يتحرك في اتجاهات صحيحة، وفي نفس الوقت بشكل معقد للمدافعين وغير متوقع، وتأكيدا للكلام ده فاهو بالمناسبة حصل،

كريستيانو في اختبار لقدراتة في عام 2011، قدر يسجل 3 أهداف في أجواء مظلمة! كان الأختبار بينص علي ان أخر حاجه كريستيانو يشوفها هي لحظة خروج الكرة من أقدام اللاعب الأخر وبعد كده يتم إطفاء الأنوار وتكون مفيش مجال لرؤية أي شئ تاني، والنتيجة ان كريستيانو نجح في التسجيل في الثلاث مرات وبوضعيات مختلفة!

وقتها علماء مختصين حللوا الموضوع ده علي انه غير طبيعي وان كريستيانو عنده القدرة علي انه يحدد مكان الكرة في عقله قبل ما تصل لأقدامة، فالبتالي أقدامه تلقائي بتقدر تتعامل بعدها مع الموقف، وان رد فعل الأنسان لشئ معين بيحدث في 200 جزء من الثانية، إما ردة فعل كريستيانو بيصل ل 500 جزء من الثانية!

ووقفًا للدراسات والأختبارات، فا كريستيانو لما بييجي يراوغ لاعب بيبقا عنده القدرة علي معرفة تحرك اللاعب هيكون في أي أتجاة، اثناء ما المدافع باصص علي الكرة كريستيانو في اللحظة دي بييقا باصص علي ركبة اللاعب وفخذه وهنا بيستغل تركيز المدافع علي الكرة ويغفله،

اللي بيخليه يقف في المكان الصحيح ويتحرك بشكل يصعب علي المدافعين مراقبته وكمان يقدر يراوغ بسهولة، وأكيد ده واقعيًا شئ ملموس با أعتراف الكل كريستيانو علي سبيل المثال أفضل لاعب يعرف يسجل أهداف ومن ولا فرصة قادر يسجلها، ومش لازم يكون في كل أهدافه بس معظم الأهداف نتيجة كل هذا! كل الأشياء دي نتيجة تدريبات مكثفة.

التنوع الفني: 
كريستيانو تنوعه الفني والتكتيكي جعله يلعب في مراكز متعددة، يعني تقدر تقول با استثناء حراسة المرمي والدفاع، فا كريستيانو بدون مبالغة لعب في كل المراكز التانية والأبهار انه قدر يتأقلم مع أي وضعية وخطة،

في مرة كان بيحكي مورينيو انه طلب من كريستيانو يلعب مهاجم أمام برشلونة في 2011، وده مركز كان أول مرة يلعب فيه ومع ذلك قدم مستوي جبار وقدر يتأقلم في المركز ده بشكل لافت ويسجل ويصنع الفارق، وقيس علي كده انك عندك مثلا كريستيانو اللاعب الوحيد اللي اتواجد في تشكيلات الflfi في ثلاث مراكز مختلفة!

ونجاح كريستيانو مع المدربين اصحاب الأفكار التكتيكة المختلفة ومع الأندية المتعددة واللي بتتبع أفكار تكتكية مختلفة، ومع لاعيبة امكانياتهم وافكارهم مختلفه، أكبر دليل علي انه لاعب فنيًا أعلي من كل الموجودين لأن مستحيل تلاقي لاعب نجح مع الكم الهائل من المدربين والأندية ده.

التسديدات : قوة تسديد رونالدو للكورة بتبلغ 119 كم في الساعة وده بيخليه صاحب اسرع وأقوي تسديدة!

علي سبيل المثال، في تحليل لطريقة تسديد كريستيانو للركلات الحرة والتسديدات عمتًا، فا كريستيانو بيستخدم كذا طريقة يسدد بها و نتيجة اتقانة ليها مش صدفة،

كريستيانو بيقوم بركل الكرة في منتصفها وده بيخلي الكرة تدور حول نفسها وتنحني في الجو بحوالي 3 أمتار وده بيخلي حارس المرمي لا يراه الكرة إلا في أخر لحظة، ساعتها بقا تكون في المرمي!

وكمان في تكنيك أخر بيستخدمه، بيقلل من حركة مفصل القدم وبالتالي الكرة بتقلل من دورانها و بتتسدد بقوة،

ومن باب التأكيد رونالدو مسجل 64 ركلة حرة مباشرة، اكثر لاعب بين كل الموجودين اللي بيمتلك اهداف من خارج منطقة الجزاء من مسافات بتعدي ال40 يارده، وده أن دل فابيدل علي قوة التسديد وان اهدافه مش من مقشرات، وعايزكم تتخيلوا ان من قوة تسديداته فاهو اتسبب في اصابة بعض الحراس،

الارتقاء والرأسيات المتقنه : 
إرتقاء رونالدو بيوصل لمعدل 2.96 سم, معدل اعلي من لاعيبة كورة السله لأن رونالدو بيقفز با اكتر من 8 سم عن المعدل الطبيعي للاعيبة كرة السله!

اتقان رونالدو للراسيات خلاه يسجل 149 هدف من الضربات الرأسيه! رونالدو قادر علي التسجيل برأسه من الوضعيات الصعبه و كل الاتجاهات الصعبه، لدرجة بيسجل براسه اهداف من علي منطقة الجزاء، او في زواية مقفوله وكل ده بنشوفه،

وفي فرق بين الارتقاء والراسيات المتقنه عشان تأخدوا بالكم من الصفتين، الرأسيات ان حد يجيب هدف بدماغه، والارتقاء ان حد يقفز لفوق" يطير"، والاتنين مش بالشئ السهل فا مبالكم لما تتجمع في لاعب واحد؟!

القوة البدنية واللياقة العالية : 
تحليل جسم رونالدو طبيا وتشريحيًا جسم شخص عنده 20 سنه! لانه بيمتلك نسبة دهون قليله جداً 7% معا أن المعدل العادي للرياضين وللاشخاص العاديين 11%، قوة رونالدو العضلية 50% معا أن المعدل الطبيعي 47%، وده بنشوفه من خلال تكوين جسمه والشكل اللي بيبقا عليه،

اللطيف في الأمر ان جسم رونالدو والوضعيه البدنيه اللي عليها، يخليه ينفع لاعب كورة سلة ده لو حاببها، ويخليه يلعب تنس ده لو عايز، ويمارس السباحه ده لو حابب السباحه، او يكون من ضمن لاعبي ألعاب القوي بمختلف اشكالها، يعني جسم قادر يتعايش مع أي رياضة ليس الكرة فقط،

وما لا شك فيه ان قدرة كريستيانو علي اللعب لحد دلوقتي وانه قادر علي العطاء دليل علي كده، مع انه في بدايته كان نحيف ولاعب نقطة ضعفه هي قوته البدنيه،

لكن كل ده في الأساس نتيجة شغل أستمر لسنين، نتيجة مجهود رهيب اتبذل وتدريبات لمدة اكتر من 15 ساعة يوميا ونظام غذائي صارم، نتيجة التزام فريد من نوعه لدرجة انه لحد دلوقتي أول من يحضر تدريبات وأخر من يمشي.

الشخصية والحسم: 
مش هنروح لبعيد شخصية رونالدو مفيش اقوي منها، مفيش حد ممكن يتألق تحت النقد ويظهر في المواعيد الصعبة قده، الثقه في نفسه وقدراته مش معقوله،

عنده الجرأه انه يطلع يقول قدام العالم كله أنتظروا ريمونتادا وفعلًا يعملها عادي، الثقة دي خلت اللي حواليه كمان يطمنوا لما يكون موجود معاهم، رئيس اليوفي وهو بيقول ان الموضوع العودة قدام الاتلتيكو صعب، فيرد عليه واحد يقوله لكن اطمئن فا كريستيانو قال سنعود توضحلك الأمر أكتر!

عقليه كريستيانو الاحترافية خلته ميقبلش ابدا غير انه يكون رقم واحد وشغفه وتعطشه للأهداف والفوز يستمر، وده اللي ببساطة جعل كل اللاعيبة الشابه في العالم تعتبره هو القدوة والمثال وانه يكون أكثر شخص لي تأثير في العالم وصاحب أكبر شعبية جماهيرية وحضوره دايما طاغي علي أي حدث،

وأظن مش محتاج إني اوضح الجزئية دي أكتر لأنها واضحه لوحدها، بمجرد ما بتيجي كلمة حسم وشحصية فذة بتتحمل الضغوط وإلخ، فا عقلك بيروح تلقائي لأسم رونالدو فقط حتي لو أنت كنت من كارهينه،

كريستيانو أكتر من سجل أهداف في أدوار حاسمة ونهائيات وأكتر من سجل أهداف الفوز او التعادل او في حالة خسارة او تعادل فريقة، سجل في أقوي الفرق والحراس ولا داعي لذكر أسماء، أكتر لاعب غير محمي وأكتر من تحمل وواجه ضغوط ونقد وقدر في الأخر يتغلب علي كل الأشياء.

الصناعة : من اكتر الأشياء المُضله هي محاولة البعض حصر امكانيات كريستيانو في التسجيل فقط، مع ان كريستيانو من أعظم اللاعيبة اللي قادرة علي صناعة الأهداف وخلق الفرص وإيجاد الحلول والصناعة بكل الطرق،

كريستيانو اتأقلم في مركز المهاجم من قريب مش من زمان، معظم مسيرة كريستيانو والجزء الأكبر منها كان مبيلعبش مهاجم، بل مكنش بيسيب مكان في الملعب غير ما يلعب فيه وبيشكل خطورة من كل مكان في الملعب،

كريستيانو عنده 275 اسيست، رقم مش قليل ولا ممكن يكون للاعب بيسجل اهداف بس ابدا، زيد انه قدر يصنع أكتر من 950 فرصة تم اهدارها من زمايلة، واظن ان انجاز ان يصنع العدد الكافي ده من الأهداف نظرا للمهاجمين اللي لعبوا معاه اللي كانوا متواضعين.

لحد هنا وبنوصل لنهاية الامكانيات اللي ممكن تتوفر في لاعب كرة القدم، وزي ما شوفتوا بالدليل فا كريستيانو أمتلك كل المقاومات والأمكانيات وهذا الذي لم يتوفر في لاعب أخر، وبجانب المواصفات الفريده من نوعها اللي أنا ذكرتها،

فا انا بتكلم ومش بعد في امكانيات كدة وخلاص! انا عايز اقولك انه قدر يستغل كل ميزة بالشكل الصحيح وقدر يطور من نفسه مع مرور السنين، من الأخر رونالدو عنده ميزة مش في حد تاني، هو اللاعب الوحيد اللي ماعندوش نقاط ضعف في جسمه، بمعني أخر،

انه اللاعب الوحيد اللي قادر يسجل بكل حاجه ممكنه، زي انه يسجل بقدمه اليسري "الضعيفة"  ويستخدمها بنفس الدقه والقوة لقدمه اليمين لدرجة انه سجل بيها اكتر من 100 هدف، ده غير انه بيسجل بالكعب وبالدبل كيك، مسجل برأسة أكتر من 100 هدف، قوة بدنية وسرعة، وشخصية وحسم، ومهاراة وأهداف وإلخ.

*

المسيرة والنجاحات:

مسيرة كريستيانو بتشرح نفسها، مسيرة استمرت اكثر من 19 سنه، شملت السنين دي اعتلاء للقمة لأطول فترة زمنيه وتقريبا اسمه مخرجش من بين الأفضل، استمرارية رهيبه في التطور موسم ورا الأخر،

لدرجة هتلاقي نفسك محتار تختار أي المواسم واي الفترات اللي كان فيها الأفضل، لأن كل فترة ليها مميزاتها واتميزت عن التانية واتجسدت فيها كل معاني الأبهار، مسيرة فيها نجاحات ليس لها مثيل في كل مكان راحه وكان الأفضل رغم ان المسيرة بشكل عام تعتبر هي الأصعب،

هتلاقيه بيتصنف في الريال والدوري الاسباني من ضمن الافضل في التاريخ، وفي مانشستر أحد اساطير الفريق وافضل لاعب في تاريخ النادي علي حسب كثير، وحتي في إيطاليا ارقامه هناك لازالت صامده، وهذا لو تعلمون عظيم،

يكفي القول ان كريستيانو بعد عمر الثلاثين كتب كل نجاحاته تقريبا، مع ان ده ضد الطبيعه والمنطق، ويكفي انك لو سجلت 40 هدف لمدة 20 سنة وده من الخيال طبعا بس رغم ذلك مش هتقدر توصل لعدد اهداف كريستيانو، 1085 مساهمة في 1155 مباراة، يعني تقريبا هدف او اسيست في كل مباراة لعبها في مسيرتة!، شئ غير طبيعي،

كريستيانو الوحيد اللي هتلاقيه موجود في التشكيلات لأفضل لاعيبة في 2004 - ولحد دلوقتي، وانه يكون هداف فريقه والبطولات اللي بيفوز بها لمدة 15 سنه متتالية، وده التجسيد الواقعي لكلمة استمرارية.

الألقاب والأرقام القياسية: 
الجزء ده أكتر جزء مش هتكلم فيه كتير لأن زي ما كله عارف فا أكبر قدر من الأرقام القياسية بحوذته بل أن الأرقام اللي ظلت مستعصية لعقود من الزمن حطمها، فا هناخد مقتطفات من الأرقام،

هداف كرة القدم التاريخي 828 هدف، هداف المنتخبات التاريخي 119 هدف، هداف ريال مدريد التاريخي 450 هدف، هداف دوري أبطال اوروبا التاريخي 140 هدف،

هداف بطولة امم اوروبا التاريخي، هداف تصفيات امم 
اوروبا التاريخي، هداف تصفيات كاس العالم التاريخي، هداف كاس العالم للأندية، هداف كل مايتعلق ببطولات الاتحاد الاوروبي علي مستوي الأندية والمنتخبات،

34 بطولة متنوعه، من ضمنهم 5 دوري ابطال اوروبا، 3 بطولات دوري انجليزي و2 دوري اسباني و2 دوري أيطالي، الوحيد اللي فاز بالبطولات المحليه دي، و 4 بطولات لكاس العالم للاندية، وكأس وسوبر إيطالي اسباني وانجليزي و وبطولاتنين مع المنتخب، دي ابرز القابة،

وهنا بالذات عايز اقول حاجه، كريستيانو من ضمن اكثر اللاعيبة فوزا بالألقاب الجماعيه، لكن هي مش بكثرة الالقاب قد ما هي بتنوعها وانك تكون سبب رئيسي ومؤثر في الفوز بما يقارب 90% من هذه البطولات، دي هي المعادلة الصعبة،

الكورة الذهيبه 5 مرات، الحذاء الذهبي 4 مرات، الافضل في اوروبا 3 مرات، الافضل من الفيفا 3 مرات، بنتكلم في 15 جايزة فرديه، الهداف + الأفضل في إسبانيا إنجلترا إيطاليا،

لحد هنا وهكتفي ببعض الأرقام الجماعية والفردية القياسية اللي ذكرتها واللي تعتبر قليله جدا من اللي بيمتلكه، لكن وما خفي كان أعظم.

*

وصف الفرق بين رونالدو وبين أي لاعب أخر، ممكن يتم معرفته بشكل بسيط وسهل وملحوظ، حتي لو ده بيصعب علي البعض تقبله و الأعتراف به..

كل لاعب من الأجيال السابقة كان بينقصه حاجه، وفي الجيل الحالي مفيش لاعب كان متكامل، كله عنده العيوب والنواقص وفي شئ مش قادر عليه إتقانه، إنما كريستيانو كسر القاعدة واصبح اول لاعب يجسد الكمال الكروي!

الكمال اللي خلاه يتقن كل شئ وقدر يجمع ما بين كل شئ في كرة القدم من أرقام قياسية مُبهره، لأداء فني متكامل، لعقلية وقوة بدنية، ويعمل با الكرة كل اللي نفسه فيه،

جعله يتألق في اي مكان يلعب فيه ويعمل مسيرة احترافية هي أعظم مسيرة للاعب كرة القدم وميتأثرش بغياب لاعيبة او منظومة، خلاه عنده المواصفات اللي يمتناها أي لاعب واللي يتمني اي مدرب انها تتوفر في لاعب يكون في فريقه،

وماتقدرش مثلاً تقول ده عنده نقاط ضعف في حاجه معينه ومعندوش القدرة علي إتقان هذا الشئ، سواء فنيًا او بدنيًا او ذهنيًا حتي كامسيرة ونجاحات، بجد متقدرش،

ختامًا لو أنت وصلت لحد هنا، أنا متأكد إنك متقدرش تنكر حقيقة اللي أنا قولته، مش هتقدر تتغاضي وتنكر  الكم الهائل من الأمكانيات والأرقام اللي اتجسدت في جسد شخص واحد لأنها كلها أشياء شوفناها في الواقع،

ومؤكد أن من المستحيل تقترح أسم شخص أخر اتجمعت فيه كل المواصفات الرهيبة دي با أستثناء شخص واحد.

لماذا كريستيانو رونالدو الأفضل؟ أعتقد إنك عرفت دلوقتي لماذا هو الأفضل.