حادث القرش بالغردقه
في ايه ياجماعة هو انتو أول مرة تشوفوا هجوم قرش علي سائح؟
أولا : دي أنثي كانت بتدور علي مكان لوضع أجنتها، فبالنسبالها أي شخص في المياه هو مهاجم فبتهاجمه والمفروض يكون في القري شخص بيعلم الناس لو حصلهم هجوم قرش يتعاملوا ازاي .
ثانيا : التايجر ثاني أشرس القروش حول العالم، وياما اتسبب في حوادث هجوم عالميا، محدش بيعمل المنا.حه اللي حاصله دي.
ثالثا : دي البيئة الطبيعيه للكائنات البحرية، الانسان هو اللي مقتحم للبيئة دي، فلما قرش يهاجم انسان دا طبيعي جدا، اللي مش طبيعي، هو فيديو الصيد والاعتد.اء بطريقة عبثية علي القرش بعد خروجه.
رابعا : القرية اللي حصل فيها الهجوم، كان مفروض تحط سياج سباحه أمن، لأن أي عيل صغير في البحر الأحمر عارف، ان في ٩ انواع من القروش بتسبح في مياه البحر الاحمر، فمن وقت للتاني ممكن يحصل ان قرش يضل الطريق، او يكون بيدور علي مكان لوضع الأجنه، او اي سبب أخر.
خامسا : روسيا نفسها مش عامله المناحه اللي الناس عملاها في مصر، ولا بتشير الفيديو بهستيريا ولا عامله بكائيات، لانها عارفه ان دا متوقع يحصل، كل اللي عملته حذرت رعاياها يخلوا بالهم، وينزلوا في اماكن تكون فيها سياج امن .
سادسا : استمرار نشر الفيديو والولوله دا مش صح علي فكره، لانه بيخوف الناس، وبيزود عمليات العنف تجاه الكائنات البحرية وبيدي مبرر لعمليات الصيد الجائر، اللي بتسبب عملية انقراض لأغلب الكائنات، علماً ان عدد حالات مهاجمة القرش للأنسان ضئيلة جدا عالميا، يمكن اللي بيموتوا بالانفلونزا اضعافهم عشرات المرات.
سابعا : هجوم القرش بيحصل معاه بالتتابع عمليات رصد لفهم سلوك الكائنات دي، وايه اللي اتغير فيها، وليه بتهاجم، وبناء عليه بيتحط طرق لمنع تكرار الحوادث غير مضره بالبيئة ولا الكائنات دي... ودا بيحصل في كل حتة في العالم...دا في دول بتحط جدول لمواعيد هجوم القرش واكتر الشهور اللي فيها الهجوم علشان الناس تخلي بالها اثناء السباحه بدون صياح يعني.
ثامنا : أحب أبشركم فيديو هجوم القرش لن يتسبب في اي ضرر في السياحه لأن العالم متفهم ... لكن اللي هيسبب كارثة فعلا هو عملية الاعتدا.ء الوحشية علي القرش... أولا الناس هتشوف ان دا سلوك غير انسا.ني ومتو.حش، بالاضافه الي ان منظمات الدفاع عن الكائنات البحرية مش هتسبنا في حالنا.
تاسعا : الناس اللي عماله تقول الفيديو بشع، عندي سؤال، هو وانت داخل تتفرج علي فيديو مكتوب عليه هجو.م قرش، كنت متخيل أيه؟
تدخل تلاقيهم بيلعبوا اسكواش مثلا؟ ولا كنت متخيلين انه قرش خريج هارفارد فهيكون بيهاجم بالشو.كه والس.كينه؟
عاشراً واخيرا : مبنشوفش المناحه دي لما بيحصل عمليات صيد جائر للحيوانات او الكائنات البحرية، بس اول ما يحصل عمليه هجوم لكائن في بيئته الطبيعيه اللي الانسان راح اقتح.مها، نلاقي ولوله في كل حتة.
اهدوا ياجماعه مش طالبه خالص انكم تخوفوا الناس
