تايه في عيوني / الشاعرة عايدة جابر
تايه فى عيونى
واطمن ليه ؟
ده انا قلبى وجعنى
يا ناس بأيديه
واهو حلم وضاع
من بعد ما باع
قلبى المتباع
عمال يسألنى
ازاى بسهوله
أنا هنت عليه؟
من بعد ماكنت
سكنت القلب
وفرحة عمره
وضى عنيه
ونودع ناس
يطلع لنا ناس
ويموت جوانا
مع كل فراق
مليون إحساس
بكفايه جراح
واهو حلم وراح
ونسينا خلاص
ولا فيه فى الدنيا
حبيب مرتاح
وان باعك بيع
وان كان هيضيع
هو اللى اختار
فى الدنيا يعيش
تايه سواح
وقالولى الناس
ماشى يترنح
يجى على بابك ويروح
وانا ايه ذنبى
توجعوا قلبى
ده انا كنت له ليلى
لكنه فى يوم عمره ما لوح
وان مر عليا فى أحلامى
هاخرج م الحلم وينسانى
وان خبط مره على بابى
أعتابى بتتوجع تانى
وفى يوم الصدفة بتجمعنا
بطريق يجمعنا بأوجاعنا
ولمحته لقيته عاشق مسكين
ولغلبه ده مية مليون معنى
أتاريه درويش ماشى يطوح
وفى حضن هوايا بكى ونوح
قال لى أنا تايه جوه عيونك
رحال فى بلادك كيف أروح
ضميته فى لحظه لأحضانى
أنفاسه تطمن وجدانى
نسانى جراحى وأحزانى
خلانى معاه فى عالم تانى.
