الوعد دين الحب / الشاعر محمد الليثي
الوعد دين الحب
إلى من جعلت قلمي يهمس في أذن الورقة بأنني أحب
إزيك
عامله ايه
يا حلم يوماتي أنا بحلم بيه
ف بدء الشات
بقولك إني جاي وحدي
ولا أملك لأ مال ولا بيت
رصيدي من الغنا أبكي
نصيبي بأن أنا حنيت
ومهرك قلب م الجنه
إذا يشوفك يقول حبيت
وجيب فاضي
ومشاريعي ف أحلامي
وناس بتصد قدامي
خطاوي الحلم ماتكملش
وايد شقيانه يوميا
لكن صعبه تجيب القرش
ورجل بتسعى ف عيونك
وأرض بوار
وعايزة الطرح من لونك
وروح شاعر
بتفرح بعد ما بتكتب
وتكتب بعد ما بتحزن
وتحزن لما تبقى معاه
بنات الدنيا من دونك
فجيبي الفرح في الأشعار
وخلي الشعر مضمونك
يابنت بألف بنت وحور
يا أجمل من كيان عصفور
بتبني فيا وتقشي
يا قافل قلبي ع العالم
وسايبك فيا تتمشي
أنا عارف بحبك كل دا من إيه
من الراحه اللي ف عيونك
من الطيبه ف كفوف الايد
من إني كل ما أشوفك
أحس بفرح يوم العيد
لأول مره طفل شريد
يلاقي الضمه من روحك
ف حاسبي الحضن يكسرني
و خلي الحزن يخسرني
دا سعي العمر دمرني
من عالم بيزقوا المر
يا نسمة وطيف
ما بعد خريف
تزهر روحي لما تمر
يا أول حلو بعد المر
وأول خطه ارسمها
تكون محبوكه بالمللي
اقرّء روحي للعالم
واسيبك فيا تتملي
وتتمايلي كما الرقصه
كما النسمه إذا تهلي
رسمتك ف الطريق مرسى
عشان بحفظ كتير وأنسى
آيات الله إذا تنسى
ف إيه غيرك ينجيني
أميرة امرتي بهدايتي
اشوفني فيكي يا مرايتي
واشوفك جنتي وآيتي
وروحي الساعيه ويقيني
بحبك حب لو اتوزع ع العالم
يفيض منهم ما يكفيني
باقولك أيه
بلاش أحكي كتير ياما
دلايل حبي بعلامة
بأني الشاري والله
ع الرغم إني ما أملك غير
سوا حبي ٠٠ سوا قلبي
اللي بابه تملي مفتوحلك
وقافل عن حديث يا ما
لكنه بيجي ويبوحلك
بأسرار العيال بينا
يعينا الله على عينا
نلاقي الفضل والمنه
إذا فكرتي بقليبك
فأنا لا هقولك إزيك
ولا طالب صداقة وغير
أنا جايلك بروح صافيه
وطالب إيد تحب الخير
فإن كنتِ موافقه على حياتي
فأنا هفضل ولحد مماتي
شايل ف القلب ليكي جِميله
تفضل وبطول عمري اصونك
ولحد ما هبقى ف يوم راحل
إن كنت موافقه على حياتي
قولي لوالدك
إن أنتوا بتشتروا ١٠٠ راجل
مسكن وأمين
ف هقسم روحي عشان روحك
وهطيب م القلب جروحك
وهكون جارك
عيوني اوضه لسريرك
واوضه تضم أطفالك
وقلبي صالون عشان خاطرك
يساعي كل من زارك
و عفشك ليس من دمياط
لكنه أصيل وفيه منك
فلو ع الدبله والخاتم
فلو ع القاعه والخادم
ولو ع الكسوه وآلله
ف حضني جاي ومتفصل
على زوقك كما تحبيه
ولو يعني مصره قماش
فزيدي حضني وقت البرد
بلاش ترميه
فقير الناس وجيت لك
أكسب الجنه وبلاش مالي
جيت لك تسألي مالي
أقول خفيت
أقول حبيت
وقلبي نقى واختارك
ولو تشغلني ١٠٠ دنيا
مصمم بردو افضالك
بقولك إيه
إن كنت موافقه على حياتي
فأنا شاكر لأفضالك
محمد الليثي
