انتهي العام ولم تحقق أهدافك؟

بسم الله الرحمن الرحيم أما بعد ...........
ليه مفيش حد فينا مثالي ؟ وليه مش هيجي الشخص المثالي اللي عمره ما هيعمل غلط او يذنب في حياته ؟ 
دولة الفساد فيها بيزيد والناس ساكته ومحدش قادر يتكلم!!طب ما تيجي نلوم نفسنا !!! بما إن السنة باقي عليها ايام قليلة وتنتهي ما تيجي نجيب ورقة وقلم ونكتب العيوب اللي عندنا حتي لو كنا مليانين عيوب, بس لما تكتب عيوبك علي ورقة حقيقي دي هتكون أول خطوة في أنك تكون شخص سوي وصالح. ومش لازم بقي نقول البلد فاسدة, البنات لبسهم مايرضيش ربنا, الزنا كتر, الدهب غلي, الدولار رفع, إلخ...........
أبدأ بعيوبك وملكش دعوة بغيرك. والله انا بكتب البوست ده بعد ما عرفت عيوبي وبصلحها من بداية أول كلمة كتبتها. وأتمني اني ابدأ سنة جديدة أنسان جديد صالح, إنسان مستعد يقابل ربنا في أي وقت. 
السنة خلصت ومحققتش ولا هدف !! 
شوف الاساسيات الاول يا صديقي .... شوف كام فرض تركته... شوف نفسك مسكت المصحف كام مرة .... شوف نفسك تصدقت كام مرة.....شوفت صور لا ترضي الله ورسوله!! ....... شوف نفسك عصيت ربنا كام مرة في السنة دي..... 
لما تجاوب علي الاسئلة دي هتلاقي تقصير كبير هو السبب في عدم توفيق ربنا ليك والله. ولو كررت نفس الاخطاء دي هيحصلك نفس الموضوع. 
طب انا عايز انجح بإذن الله واجتهد اعمل اي؟ 
- ركز ع الاساسيات اللي انا قولتها فوق دلوقت والتزم وصلي الفجر في معاده اقرأ قران بلاش تشوف حاجات تندم عليها بعدين تصدق علي الفقرا............... هتلاقي توفيق من ربنا انت مكنتش تتوقعه
الناس اللي ركزت علي الاساسيات والتزمت عارفه كويس معني كلامي لانهم شافو ده وربنا رزقهم من حيث لا يحتسبوا فعلا. 
- تاني خطوة هات ورقة وقلم واكتب عيوبك واشتغل عليها وكل يوم راجع نفسك هل انا بصلح عيوبي ولا بيزدها؟؟
- تالت خطوة اكتب الاهداف اللي انت عايز تحققها وقسمها علي 12 شهر وشوف كل شهر هتعمل اي وقسم مهام الشهر علي اربع اسابيع وابدأ اشتغل علي اهدافك. 
قال الله تعالي:
(مَنْ عَمِلَ صَالِحًا مِنْ ذَكَرٍ أَوْ أُنْثَى وَهُوَ مُؤْمِنٌ فَلَنُحْيِيَنَّهُ حَيَاةً طَيِّبَةً وَلَنَجْزِيَنَّهُمْ أَجْرَهُمْ بِأَحْسَنِ مَا كَانُوا يَعْمَلُونَ )صدق الله العظيم

بقلم / يونس أبوعجيلة