ازاي اخلي الجرو يبطل يعض

طبيعي ان الجرو يعض كل حاجه من سن صغير خصوصا اول مابيبدأ يسنن بيحتاج دايما حاجه يعضعض فيها الموضوع بيبقي سهل في السن الصغير بس بعد كده هيقلب بجروح لأن الكلب مش هيعرف يتحكم في العضه  

 ازاي اخلي الجرو يفرق العض عن اللعب في السن الصغير ؟  

١_ في الغالب الجراوي اما بتلعب مع بعض وواحد فيهم يعض التاني طبيعي انه يعمل صوت من الألم لو حس بوجع زي ميكون بيصوت كده في وقت التدريب علي عدم العض انت ممكن تقلد الصوت ده او تعمل صوت قريب منه عشان يبطل عض ويعرف امته العضه بتكون جامده   

٢_ اول مايبدأ يعض جامد إرخي عضلات ايدك وقلد الصوت أو أي صوت عالي يدل علي الوجع 

 ٣_ لو شديت ايدك من بوقه هيعض اجمد عشان متشدهاش  

٤_ لو عملت كل ده وبرضه الكلب ماسابش ايدك تعمل ايه ؟  زق ايدك ناحيته جوه بوقه اكتر عشان يسيب   

٥_ اهم حاجه في موضوع التدريب علي عدم العض انك متكررش الحركه دي اكتر من ٣ مرات خلال ١٥ دقيقه .الفكره من كده ان الكلب يفهم ان اللعب الخفيف بيكمل انما العض جامد بيوقف اللعب   

ازاي بقي اخلي الكلب يبطل عض خالص حتي لو لعب ؟   

أولا .أول ماالجرو يحاول يعضك ابعد ايدك واديله اي لعبه يعض فيها  

ثانيا . عشان تبعده عن موضوع العض لازم نحط قدامه دايما لعب جذابه من المخصصه ليهم  

ثالثا .ممكن نعمل لعبه في البيت ونحط جواها دراي فود كا نوع من المكافأه 

وأهم حاجه في التدريبات دي أنها تكون في سن صغير عشان كل ما الكلب بيكبر كل مايكون صعوبه التعلم اكبر و لعند مايتعلم ويتدرب نحافظ علي نفسنا كويس جدا من اي خدش او جرح سطحي ناتج عن اللعب معاه ونطهر الجرح بسرعه عشان نحمي نفسنا من اي أمراض ممكن تتنقل لنا من الكلاب 

كمان حفاظا علي سلامتنا وسلامه الكلب نحاول نقدم له عضم ويكون ني مش مستوي عشان يعض فيه هيبقي مصدر كويس للكالسيوم عشان سلامه عظامه واسنانه نحاول مانقدمش عظام فراخ سواء نيه او مستويه عشان متتكسرش ويبلعها وتعمله مشاكل .وياريت ننظف العظام كويس وتكون خاليه من اي دهون وتكون عظام  سميكه يفضل عظام الفخذ ولو قررنا نسويها مع انه لا يفضل تسو يتها نراعي عدم وضع توابل او بهارات او بصل ونقلل كميه الملح قدر الإمكان