اوعي تفكري في التنازل عن حلمك
كتير بنكون في مواقف ومراحل فاصله في علاقتنا مع الطرف التاني واللي بيكون فيها ضروري أننا نتنازل عشان العجله تمشي او تمر الازمه بس عمر التنازل ما كان حل بالعكس الموقف بيسؤ اكتر واكتر بعد التنازل باستأل نفسك اشمعنا أنا ليه أنا اللي اتنازل ليه مش هو او هي حسب الموقف .
واللي يوجع اكتر لو قدامك حسسك ان تنازلك دا واجب عليك وانك كدا كدا كنت هتتنازل لانه عارف هو قد ايه مهم في حياتك وانك مش هتعرف تعيش من غيره زي ما بنقول كدا ضمنك ومتأكد أنك ملكه ومش هتكون ملك لغيره .
احساس دمه تقيل اوي ولو فاكر ان الاحساس دا هيروح مع الوقت احب اقولك أنك غلطان لأنه مع الوقت عجله التنازل هتدور وهتلقي نفسك مطالب أنك لازم كل مره تضحي و تتنازل وزي ما بيقولو أول الغيث قطره هتبدا تتنازل كره والتانيه و التالته والربعه وهكذا لحد ما تلقي نفسك موجود في حياه اللي معاك عشان تتنازل وبس حلمك واتنازلت عنه هدفك نفس الكلام شغلك حياتك هتلقي نفسك عايش حياته هو مش حياتك أنتا وتلقي نفسك اتلغيت .
تبص بقي تلقي كل المواقف اللي اتنازلت فيها واقفه في جنب وبتعتبك عتاب شديد عتاب يوجع كان ليه واشمعنا أنتا ليه مش هو والأسئله دي بقي تاكلك من جواك تلقي نفسك أنك عملت كل حاجه وقدمت كل حاجه وماخدتش ولا حاجه .
والشخص التاني بقي عايش حياته من غير ندم من غير ما يشيل هم ما أنتا خلاص قدمت اللي عندك هيقول بنفسه عادي يتنازل تاني اقصد مليون .
عشان كدا ارجوكوا اوعوا تتنازلوا ابدا ابدا .مهما حصل أنتا حياتك واحلامك واهدافك مهمه زي احلام واهداف وحياه الشخص التاني ان ما كنتش اهم .
لازم وجودك في حياه الشخص مهم عشان أنتا مهم مش عشان تتنازل عشان أنتا نصه التاني واللي ممكن ما يكونش واخد باله انه بيلغيك من غير ما يقصد حاول معه أنك تفهمه قد ايه احلامك مهمه زيه لو فهم يبقي يا بختك ولو مفهمش يبقي متتعبش نفسك .
امشي من غير اسأله لأنك هتلقي اجابات لا تسرك قل وداعآ وارحل في هدوء .
