محمد صلاح وماذا قدم منذ انضمامة للدورى الانجليزى

محمد صلاح وماذا قدم منذ انضمامة للدورى الانجليزى

0 reviews

الأكيد والواضح للعيان والمعروف للجميع يعني، إن منذ إنضمام محمد صلاح للبريميرليج مع ليڤربول، فمفيش حد مسجل أهداف أكتر منه ب 100 هدف، وأقرب ملاحقيه بيفرق عنه ب 12 هدف بالتمام والكمال وهو هاري كين قائد المنتخب الإنجليزي، بس دي معلومة المعظم ملم بيها، لكن اللي كتير من الناس مش ملمين بيه هو إن دور صلاح في الملعب، وإستمراريته الكبيرة، أبداً مش مقترنة فقط بتسجيل الأهداف، إزاي بقا ؟

صلاح في أول 3 مواسم ليه مع ليڤربول صنع 28 هدف، وفي الحقيقة إن دا أعلى رقم في تاريخ كل لاعبي ليڤربول في البريميرليج في أول ثلاث مواسم ليهم في البطولة، وبيتشارك معاه روبيرتسون نفس الرقم، وحتى الآن صلاح صانع 36 هدف في البطولة بجانب تسجيله ل 100 هدف، دا ينقلنا لنقطة مهمة جداً جداً..

كون أجويرو، أسطورة المان سيتي ولاعبها السابق قدر إنه يساهم في مسيرته في البريميرليج في 231 هدف بين تسجيل وصناعة في 275 مباراة، دا بيعني بالضرورة إنه بيساهم في 0.84 هدف في المباراة الواحدة، وفي تاريخ البريميرليج الطويل العريض في اتنين لاعيبة بس أعلى من المعدل دا، الأول طبعاً هو الغزال تييري هينري، وأعتقد إنك خمنت مين التاني يا صديقي، بمعدل أعلى بنسبة بسيطة جداً من أجويرو، فصلاح إما بيصنع أو بيسجل 0.842 هدف في المباراة الواحدة في البريميرليج..

بس في نقطة مهمة هنا لازم تعرفها، بما إن صلاح مسدد الركلات الترجيحية الأول في ليڤربول من فترة يعني ف....... لا عادي دا مفرقش أي حاجة ولو شيلنا ضربات الجزاء صلاح برضو هيحتل المرتبة الثانية خلف تييري هينري 😃

صلاح هو ثالث أسرع لاعب في تاريخ ليڤربول يصل ل 100 هدف في جميع البطولات ودا حصل بعد 159 مباراة فقط، الشاهد في الأمر إن الإتنين اللي قبله، روجر هانت (144) وچاك باركينسون (153) لعبوا للفريق في ال Second tier أصلاً مش في الدوري الممتاز، بس انت عمال تقول كلام عن أهداف وأسيستات، إيه علاقة دا بدوره الكبير بقا اللي انت بتتكلم عنه غير التسجيل والصناعة ؟، هقولك والله، الصبر طيب..

أهلاً بيك في عالم محمد صلاح المجهول ل 90% من المتابعين، ركز معايا بقا سيكا، بداية كدا بسم الله الرحمن الرحيم محمد صلاح صنع منذ إنضمامه لليڤربول حوالي 270 تمريرة مفتاحية لزملائه في البريميرليج بس، أكثر من أي جناح آخر في البطولة، وأقرب ملاحقيه هو رحيم ستيرلينج صاحب ال 215 تمريرة مفتاحية يعني أقل ب 55 تمريرة مفتاحية بالتمام والكمال ودا حرفياً معدل موسم كامل لأحد الأجنحة وفرق مهول 😃

خليني أزيدك من الشعر بيت وأقولك إن الأمر مش مقتصر بس على التمريرات المفتاحية، لكن صلاح حتى بيمتلك جودة أعلى من أجنحة البطولة في نقطة صناعة الفرص المحققة، ومفيش أي جناح في نفس الفترة صنع فرص محققة أكتر من محمد صلاح ب 58 فرصة محققة للتسجيل، وأقرب ملاحقيه هو الفنان رياض محرز ب 50 فرصة، بس خليني أوضحلك إن الأمر أبداً مش مقتصر على الأجنحة لأن ببساطة كيڤين ديبروين هو اللاعب الوحيد من موسم 17/18 اللي صنع فرص محققة أكتر من صلاح في البريميرليج ب 84 فرصة محققة للتسجيل..

تعالى نتكلم شوية في حاجة أكثر تعقيداً بعض الشيء من الأهداف والأسيستات وهتوضحلك أكتر بكتير ليه صلاح إستثنائي..

يوم 24 مارس الماضي، ينشر موقع الداتا المميز والشهير 
جداً The analyst مقالة بيتكلموا فيها عن نوع جديد من مؤشرات قياس الأداء للاعبين، المؤشر إسمه PV وهو إختصار ل Possession Value، طب إيه مفهومه ؟ 
بإختصار شديد هو مؤشر بيوضحلك إحتمالية إن فريق يسجل هدف والكرة في مكان ما في أرض الملعب، مكان ما هو هنا ال "Possession"، ومن خلال تحركات اللاعبين الإيجابية والسلبية نقدر إننا ندي ال Credit والثناء لمن يستحقه يعني، حلو لحد كدا ؟

طيب، دا كلام جميل جداً، تفهم منه إيه بقا ؟، إن لما لاعب ينقل الكورة مثلاً من منطقة معينة إحتمالية إن الفريق يسجل منها هدف هي 5% على سبيل المثال لمنطقة الإحتمالية بتزيد فيها ل 20% مثلاً فاللاعب دا هنا خلق خطورة أكبر، وزود نسبة تسجيل الفرصة، وبقا عندنا هنا حاجة إسمها Possession Value Added، وعلى العكس فلو نقلها من منطقة أكثر إحتمالية لأقل إحتمالية فهو هنا قلل خطورة الفريق من خلال نقل الكورة لمكان أو Possession في الملعب إحتمالية التسجيل منه أقل، وما بين الإتنين هنا بيخرجلنا قيمة إسمها NPV وهي إختصار ل : 
Net Possession Value
وهي الصافي من الآخر، يعني من إجمالي اللي عمله طول الموسم هل كان الصافي إيجابي ولا سلبي ؟، طب إيه علاقة الرغي دا كله بمحمد صلاح ؟

ببساطة يا عزيزي وأعتقد إنك فطن كفاية لتوقع اللي هقوله، ف صلاح في موسم 19/20 "موسم اللقب" كان بيمتلك أعلى قيمة في كل لاعبي ليڤربول لل NPV ب 0.34، وأقرب ملاحقيه ماني كان 0.24، وروبو وأرنولد كانوا أقل منه النص ب 0.17 و 0.16 على الترتيب..

في الحقيقة إن دي إحصائية واحدة بس من إحصائيات معقدة كتير ممكن توضحلك ليه صلاح لاعب كامل متكامل مش هداف بس إطلاقاً، وليه صلاح بيتحط أحياناً في مقارنات مع صفوة لاعبي وأساطير الكورة الحاليين والسابقين، ببساطة لأنه يستحق، مش لازم يتفوق أكيد لأنها مش حرب، بس متعميش عينك عن اللي قدامك وماتقولش إنه مش أسطوري وعظيم كفاية لكم المدح اللي بيناله، ولو عينك عميت الأرقام والدلائل والإثباتات قدامك أهو، وفيها كل ما تشتهيه نفسك وتستلذه عينك، بس أرجوك أرجوك، فتح مخك، قبل حتى، ما تفتح عينك..

 

التعليقات ( 0 )
الرجاء تسجيل الدخول لتتمكن من التعليق
مقال بواسطة

المقالات

2

متابعين

0

متابعهم

1

مقالات مشابة